«Տխուր եւ վտանգավոր նորություն է, որը բերելու է շատ վտանգավոր հետեւանքների։ Չունեն ուղեղ, մակարդակ, կրթություն եւ վերլուծելու ունակություն, որ գոնե մեկ քայլ առաջ հաշվարկեն հետեւանքները»,-«Հայելի» մամուլի ակումբում լրագրողների հետ հանդիպման ժամանակ այսօր հայտարարեց Ադրբեջանի հարցերով փորձագետ Արմինե Ադիբեկյանը՝ անդրադառնալով Ռուբեն Ռուբինյան-Սերդար Քըլըչ հանդիպման արդյունքում ձեռքբերված պայմանավորվածությանը, որ ՀՀ-Թուրքիա սահմանը հատելու հնարավորություն կընձեռնվի երրորդ երկրների քաղաքացիներին։
«Սա նշանակում է, որ ՀՀ տարածք շատ հանգիստ կարող են Թուրքիայից մտնել ահաբեկիչներ, Ադրբեջանի կողմից ուղղորդված դիվերսանտներ»,-շեշտեց Արմինե Ադիբեկյանը։
Ամփոփելով ՀՀ-Թուրքիա կարգավորման գործընթացի կես տարին՝ նա նշեց, որ իշխանությունը հասկանում է՝ երկրում կարող են շատ ավելի լուրջ ընդվզումներ սկսվել, եթե պարզվի, որ իրենք Թուրքիայի պայմաններն ընդունել են․ «Դրա համար երկրի ներսում մի բան են ասում, իսկ իրականում՝ այլ բան պայմանավորվում։
Չլսված խայտառակություն է, երբ այս ընթացքում ամեն ինչ իմացել ենք Թուրքիայից եւ Ադրբեջանից։ Մեր ԱԳ նախարարը ստում է մեզ։ Չավուշօղլուն ո՞վ եղավ, որ իրենից իմանանք ճիշտը։ Ընթացքն ավելի վտանգավոր է։ Իշխանությունն ընդունելի է համարելու Արցախի կարգավիճակից, ցեղասպանության հարցից հրաժարվելը, իսկ Սյունիքի միջանցքը տարիների ընթացքում օտարվելու է ՀՀ-ից»։
Կարդացեք նաև
Լուիզա ՍՈՒՔԻԱՍՅԱՆ
