Հուլիսի 9-ին «Իջևան» բժշկական կենտրոնում Տավուշի մարզի բնակիչ՝ 36-ամյա Արմինե Է-ն երեխա է ունեցել, որից հետո նորածինը մահացել է։ Իջևան ԲԿ-Ի մանկաբարձագինեկոլոգիական բաժանմունքի վարիչ Վարդուհի Վարդապետյանն Aravot.am-ի հետ զրույցում նշեց, որ նորածնի մայրը հիվանդանոց է դիմել 26-27 շաբաթական հղիությամբ, նորմալ տեղակայված ընկերքի վաղաժամ շերտազատմամբ և արյունահոսությամբ։
Հիվանդն ունեցել է արգանդի սպիի բարդացած անամնեզ վիճակ։ Մոր կյանքի ցուցումով շտապ կատարվել է կեսարյան հատում և ծննդալուծում։
«Հարազատներին անմիջապես տեղեկացրել ենք երեխայի վիճակի, անհաս թոքերի, ինչպես նաև հնարավոր բոլոր հետևանքների մասին։ Քննարկել ենք երեխային մայրաքաղաք տեղափոխելու ռիսկերն ու հնարավորությունները։ Ծնվելուց 1,5 ժամ անց՝ նորածինը մահացել է»,- հավելեց Վարդուհի Վարդապետյանը։
Նորածնի մայրը՝ Արմինե Է․-ն Aravot.am-ի հետ զրույցում նշեց, որ նախապես իմացել է իր առողջության հնարավոր վատթարացման մասին, բժիշկները տեղեկացրել են հատուկ խնամքի կարիքի մասին՝ նման իրավիճակից խուսափելու համար։
Կարդացեք նաև
«Կեսարյան հատումը կատարվել է կյանքս փրկելու համար, ուզում եմ նաև շնորհակալություն հայտնել բժիշկներին, որ դա նրանց հաջողվել է»- հավելեց Արմինե Է․-ն։
Լիա ՃԱՂԱՐՅԱՆ
Լուսանկարը՝ Իջևան Բժշկական կենտրոնի ֆեյսբուքյան էջից
