Երեւանում 19-րդ անգամ բացվեց «Ոսկե ծիրան» միջազգային կինոփառատոնը, որին մասնակցելու են 130-ից ավելի հյուրեր, կինոգործիչներ:
Նախ հյուրերն անցան կարմիր գորգի վրայով, այնուհետեւ Արամ Խաչատրյան համերգասրահում պաշտոնական արարողությունից հետո կայացավ Մայքլ Ա. Գուրջյանի «Ամերիկացի» ֆիլմի համաշխարհային պրեմիերան:
Փառատոնի գեղարվեստական ղեկավար Կարեն Ավետիսյանի ձեւակերպմամբ, այս «Ոսկե ծիրանով», որն աննախադեպ է ինչպես լավագույն ֆիլմերով, այնպես էլ անվանի կինոգործիչների ներկայությամբ, տրվում է այն դժվարին տարիների հաղթահարման մեկնարկը, որոնց ժամանակ փառատոնը վտանգված էր:
Կարդացեք նաև
Ի տարբերություն նախորդ «Ոսկե ծիրան»-ների՝ այս անգամ Փարաջանովյան թալերները նախատեսված են երեք կինոհսկաների համար: Դրանցից մեկը նախատեսված է Կաննի և Բեռլինի փառատոնների գլխավոր մրցանակակիր, օսկարակիր ռեժիսոր և սցենարիստ, համաշխարհային կինոյի կենդանի դասական Կոստա Գավրասի համար, որը դեռ չէր հասցրել ժամանել Հայաստան: Երկրորդ Փարաջանովյան թալերը հանձնվեց Ալբերտ Սեռային: Երրորդ Փարաջանովյան թալերը «Ոսկե ծիրանի» հիմնադիր նախագահ Հարություն Խաչատրյանը հանձնեց օսկարակիր կինոռեժիսոր Թերի Ջորջին:
«Մենք չենք հիվանդացել, չենք մահացել, առաջ ենք գնում: Մենք զարգանում ենք, ու փառք Աստծո, որ կան մարդիկ, որոնք կանգնած են մեր փառատոնի մեջքին: Իմ ուսուցիչ Միքայել Ստամբոլցյանը ժամանակին ասում էր, որ եթե ուզում ես լավագույն փառատոնն ունենալ, դրա հաջողության համար երեք կարեւոր գործոն կա՝ լավագույն ֆիլմեր, լավագույն ժյուրի եւ լավագույն հանդիսատես: Այսօր այդ երեքն էլ առկա են»,-ասաց Հարություն Խաչատրյանը:
«Դուք նշեցիք լավագույն փառատոնի երեք կարեւոր գործոնները, բայց մոռացաք նշել չորրորդը՝ լավ կոնյակը»,-ասաց Թերի Ջորջը:
Հավելենք, որ տարի «Ոսկե ծիրանի» ֆիլմերը կցուցադրվեն ինչպես «Մոսկվա» կինոթատրոնում, այնպես էլ Հայաստանի կինոգործիչների միության Մեծ և Մալյան թատրոնի դահլիճներում: Փառատոնի մեկնարկի մասին բեմից ազդարարեցին «Ոսկե ծիրանի» հիմնադիրներ Հարություն Խաչատրյանը, Միքայել Ստամբոլցյանը եւ Սուսաննա Հարությունյանը:
Գոհար ՀԱԿՈԲՅԱՆ
