Վաշինգտոն – Ամերիկայի հայկական համագումարը (Համագումար) ուժգին աջակցում է 2023թ.-ի ֆինանսական տարվա (FY23) Ազգային պաշտպանության վավերացման ակտի (NDAA) H.R. 7900 Բանաձևի մի քանի հիմնական փոփոխություններին, ինչպես նաև երկկուսակցական մի նամակին, որն առաջնորդեցին կոնգրեսականներ Ֆրենկ Փալոն կրտսերը (Դեմոկրատ, Նյու Ջերսի)՝ Գաս Բիլիրաքիսի (Հանրապետական, Ֆլորիդա) և Քերոլին Մալոնիի (Դեմոկրատ, Նյու Յորք) հետ միասին:
Ակնկալելով, որ Ներկայացուցիչների պալատի լիագումար նիստը կքննարկի FY23 NDAA-ն ամենից վաղ հաջորդ շաբաթվա ընթացքում` հուլիսի 5-ին Ներկայացուցիչների պալատի Կանոնների հանձնաժողովին ներկայացվեցին մի քանի հիմնական փոփոխություններ Կանոնների հանձնաժողովի նախագահ Ջեյմս ՄաքԳավերնի (Դեմոկրատ, Մասաչուսեթս), ինչպես նաև կոնգրեսականներ Թոնի Քարդենասի (Դեմոկրատ, Կալիֆոռնիա), Դեբի Դինգելի (Դեմոկրատ, Միչիգան), Ֆրենկ Փալոն կրտսերի (Դեմոկրատ, Նյու Ջերսի), Ադամ Շիֆի (Դեմոկրատ, Կալիֆոռնիա) և Ջեկի Սփիրի (Դեմոկրատ, Կալիֆոռնիա) կողմից:
Հանձնաժողովի նախագահ Ջեյմս ՄաքԳավերնի փոփոխությունը փոփոխում է Կոնգրեսին ներկայացվող հաշվետվությունները՝ ըստ Մագնիտսկու գլոբալ մարդու իրավունքների հաշվետվողականության ակտի, որպեսզի դրանք ներառեն գործողություններ, ուղղված (1) անդրադառնալու պատժամիջոցային վարքագծի հիմքում ընկած պատճառներին և (2) պատժամիջոցի ենթարկված անձանց կամ սուբյեկտների համար հասնել դատական պատասխանատվության՝ ըստ համապատասխան իրավասությունների:
Թոնի Քարդենաս
Կոնգրեսական Թոնի Քարդենասի երկկուսակցական փոփոխությունը, որին աջակցում են կոնգրեսականներ Բրեդ Շերմանը (Դեմոկրատ, Կալիֆոռնիա), Ադամ Շիֆը (Դեմոկրատ, Կալիֆոռնիա), Գաս Բիլիրաքիսը (Հանրապետական, Ֆլորիդա), Ֆրենկ Փալոնը (Դեմոկրատ, Նյու Ջերսի), Դեյվիդ Վալադեոն (Հանրապետական, Կալիֆորնիա), Զոի Լոֆգրենը (Դեմոկրատ, Կալիֆոռնիա), Էնդի Լևինը (Դեմոկրատ, Միչիգան) և Ջուդի Չուն (Դեմոկրատ, Կալիֆոռնիա) կոչ է անում ստեղծել 2020թ.-ին Լեռնային Ղարաբաղում Ադրբեջանի գործունեության վերաբերյալ զեկույց, որը Կոնգրեսին կներկայացնի պաշտպանության նախարարը՝ պետքարտուղարի հետ խորհրդակցելով:
Կարդացեք նաև
Կոնգրեսական Դեբի Դինգելի փոփոխությունը ուժի մեջ մտնելուց հետո 90 օրվա ընթացքում պահանջում է հաշվետվություն, որը պարունակում է գնահատական Լիբանանում հումանիտար իրավիճակի, ինչպես նաև Լիբանան ցորենի ներմուծման դեֆիցիտի ազդեցության մասին՝ Ուկրաինայի տարածք Ռուսաստանի ներխուժման պատճառով:
Կոնգրեսական Փալոնի երկկուսակցական փոփոխությունը, որը համահովանավորել են նաև կոնգրեսականներ Դեյվիդ Վալադեոն, Ջեկի Սփիրը, Զոի Լոֆգրենը, Դինա Տիտուսը (Դեմոկրատ, Նևադա), Դեյվիդ Սիսիլինը (Դեմոկրատ, Ռոդ Այլենդ), Ջուդի Չուն, Ռաջա Կրիշնամուրթին (Դեմոկրատ, Իլինոյս), Ադամ Շիֆը, Աննա Էշուն (Դեմոկրատ, Կալիֆոռնիա), Գրեյս Մենգը (Դեմոկրատ, Նյու Յորք), Ջիմ Կոստան (Դեմոկրատ, Կալիֆոռնիա) և Քանի Քանվեյն (Հանրապետական, Կալիֆոռնիա) արգելում է ԱՄՆ պաշտպանության նախարարության ֆինանսավորումը Ադրբեջանին 333 Բանաձևի «Գործընկերային կարողությունների ամրապնդման ծրագրի» միջոցով:
Ադամ Շիֆ
Կոնգրեսական Ադամ Շիֆի կողմից առաջարկված երկկուսակցական փոփոխությունը պահանջում է, որ Ադրբեջանը ազատ արձակի բոլոր հայ ռազմագերիներին և գերեվարված քաղաքացիական անձանց, ովքեր դեռ կալանավորված են 2020թ.-ի Լեռնային Ղարաբաղում պատերազմի հետևանքով: Այս փոփոխությունը համահովանավորում են կոնգրեսականներ Ֆրենկ Փալոնը, Ջեքի Սփիրը, Ջեն Շաքաուսքին (Դեմոկրատ, Իլինոյս), Ջիմ Կոստան, Թոնի Քարդենասը, Դոն Բեյերը (Դեմոկրատ, Վիրջինիա), Թոմ Մալինովսկին (Դեմոկրատ, Նյու Ջերսի), Ռաջա Կրիշնամուրթին, Գաս Բիլիրաքիսը և Քեթրին Քլարկը (Դեմոկրատ, Մասաչուսեթս):
Ջեքի Սփիր
Կոնգրեսական Ջեքի Սփիրը երկու փոփոխություն է առաջարկել NDAA-ին: Առաջինը մի փոփոխություն է, որով արգելվում է ԱՄՆ անվտանգության աջակցության տրամադրումն Ադրբեջանի կառավարության պաշտպանության կամ անվտանգության ուժերին, մինչդեռ երկրորդը մի փոփոխություն է, որով կպահանջվի մանրամասն հաշվետվություն և հաշվետվողականություն ԱԶԱՏՈՒԹՅԱՆ Աջակցության ակտի 907 Բանաձևի կասեցման դրույթներով Ադրբեջանին տրամադրվող ցանկացած աջակցության համար, ներառյալ «2020թ.-ի նոյեմբերի 11-ից Ադրբեջանի կողմից Հայաստանի դեմ հարձակողական ուժի կիրառման կամ Հայաստանի ինքնիշխան տարածքի խախտման գնահատական»: Երկու փոփոխություններն էլ սատարում են կոնգրեսականներ Ադամ Շիֆը (Դեմոկրատ, Կալիֆոռնիա), Ֆրենկ Փալոնը (Դեմոկրատ, Նյու Ջերսի) և Ջուդի Չուն (Դեմոկրատ, Կալիֆոռնիա):
Բացի վերը նշված փոփոխություններից, Ամերիկայի հայկական համագումարն ուժգին սատարում է նախագահ Բայդենին ուղղված երկկուսակցական նամակին, որը դեմ է Թուրքիային հաջորդ սերնդի F-16 կործանիչների և F-16 արդիականացման սարքավորումների վաճառքին: Նամակում, մասամբ, ասվում է, որ Էրդողանի վարչակարգը «տարիներ շարունակ բազմիցս օգտագործել է իր ռազմական հզորությունը Արևելյան Միջերկրականը, Մերձավոր Արևելքը, Հարավային Կովկասը և Հյուսիսային Աֆրիկան ապակայունացնելու համար»: Նամակում այնուհետև ընդգծվում է, որ «Թուրքիայի և Թուրքիայի կողմից աջակցություն վայելող ուժերն այս ներխուժումների ժամանակ օգտագործել են ամերիկյան արտադրության զենքեր և բաղադրիչներ՝ ռազմական հանցագործություններ կատարելու համար, այդ թվում՝ նպատակաուղղված ռմբակոծելով քաղաքացիական թիրախները, ինչպիսիք են՝ հիվանդանոցներ ու դպրոցներ Իրաքում, Սիրիայում և Լեռնային Ղարաբաղում։ Դրանք նաև բազմիցս օգտագործվել են ՆԱՏՕ-ի դաշնակիցների և գործընկերների ինքնիշխան տարածքը խախտելու համար, որոնցից են Հունաստանը և Կիպրոսը»:
«Ամերիկայի հայկական համագումարը ուժգին սատարում է ճիշտ ժամանակին ներկայացված այս փոփոխություններին, ինչպես նաև երկկուսակցական նամակին, որը դեմ է Թուրքիային F-16-ների հնարավոր վաճառքին»,– հայտարարեց Կոնգրեսական հարաբերությունների գծով տնօրեն Մարիամ Խալոյանը։ «Բացի այդ, հաշվի առնելով Ալիևի ագրեսիվ հռետորաբանությունը, որը անընդհատ սպառնում է Հայաստանին, և այն, որ ադրբեջանական ուժերը միտումնավոր խաթարում են հայ բնակչության կյանքն ու ապրուստը սահմանամերձ շրջաններում և Արցախում, չափազանց կարևոր է Ադրբեջանին պատասխանատվության ենթարկել մարդու իրավունքների ոտնահարումների իր ցուցակի համար»,– հավելեց Խալոյանը։
Ամերիկայի հայկական համագումար
