2020 թվականի ապրիլի 10-ին Մալաթիա-Սեբաստիա վարչական շրջանի դատախազը Երեւանի քաղաքապետարանի աշխատակազմի սոցիալական աջակցության Մալաթիա-Սեբաստիա տարածքային բաժնի պետի լիազորությունները ժամանակավորապես դադարեցնելու մասին որոշում էր կայացրել:
2020 թվականի ապրիլի 10-ից մինչեւ 2021 թվականի փետրվարի 4-ն ընկած ժամանակահատվածում քաղաքացին զրկվել էր աշխատավարձ ստանալու իրավունքից: Ըստ «AM» փաստաբանական գրասենյակի՝ 2020 թվականի դեկտեմբերի 22-ին ՀՀ վերաքննիչ քրեական դատարանը որոշում էր կայացրել՝ պարտավորեցնելով վարույթն իրականացնող մարմնին վերացնել քաղաքացու իրավունքների խախտումը: Քաղաքացուն պատճառած վնասը հատուցելու պահանջով հայց էր ներկայացվել ընդդեմ պետության՝ Հայաստանի Հանրապետության:
Փաստաբան Կարո Խաչմանյանը (լուսանկարում) ներկայացրել էր համապատասխան ապացույցներ, ինչի արդյունքում դատարանը օրեր առաջ հայցը բավարարել է եւ վճռել՝ հօգուտ քաղաքացու Հայաստանի Հանրապետությունից բռնագանձել 1.454.129 ՀՀ դրամ, որպես բաց թողնված օգուտի տեսքով պատճառված վնասի հատուցում, ինչպես նաեւ 130.000 ՀՀ դրամ՝ դատական ծախսի գումար:
«Առավոտ» օրաթերթ
07.07.2022
