Թուրքիայի արտգործնախարար Մևլութ Չավուշօղլուն Ավստրիայի իր գործընկեր Ալեքսանդր Շալենբերգի հետ հանդիպմանը հայտարարել է, որ Հայաստանում որոշ շրջանակներ չեն ցանկանում, որ տարածաշրջանում խաղաղություն լինի, և ճնշում են գործադրում Երևանի վրա, ինչն էլ խոչընդոտ է հանդիսանում Հայաստանի և Թուրքիայի հարաբերությունների կարգավորման գործում:
«Ճնշումը թույլ չի տալիս Երևանին համարձակ քայլեր ձեռնարկել կարգավորման ուղղությամբ: Մենք պատրաստ ենք կառուցողական երկխոսության: Տարածաշրջանը երկարատև խաղաղության կարիք ունի»,- ասել է Չավուշօղլուն:
Նա նշել է, որ Երևանն առայժմ պատրաստ չէ անցկացնել հայ-թուրքական հարաբերությունների կարգավորմանն ուղղված բանակցությունների հերթական փուլերը:
Անդրադառնալով հայ-ադրբեջանական հարաբերություններին՝ Չավուշօղլուն հերթական անգամ կրկնել է, որ Թուրքիան «բոլոր փուլերում խորհրդակցում է և կոորդինացնում է իր գործողություններն Ադրբեջանի հետ»:
Կարդացեք նաև
Չավուղօղլուն նաև կարևորել է Ուկրաինայի պատերազմի ֆոնին Ասիայի և Եվրոպայի միջև միջանցքի կարևորությունը և այդ համատեքստում՝ նաև հայ-ադրբեջանական ենթակառուցվածքային նախագծերը, այդ թվում այսպես կոչված «Զանգեզուրի միջանցքը»:
Պատրաստեց Վիկտորյա ԱՆԴՐԵԱՍՅԱՆԸ
