Առեւտրի եւ ծառայությունների ոլորտում վաճառողի կամ ծառայություն մատուցողի կողմից ակցիաների իրականացման եւ կազմակերպման գործընթացի կարգավորմանն ու դրանց հետ կապված սպառողների իրավունքների եւ շահերի պաշտպանության մակարդակը բարձրացնելուն է ուղղված ««Առեւտրի եւ ծառայությունների մասին» օրենքում լրացումներ կատարելու մասին» եւ «ՀՀ հարկային օրենսգրքում լրացում կատարելու մասին» նախագծերի փաթեթը:
ԱԺ տնտեսական հարցերի մշտական հանձնաժողովի հուլիսի 4-ի արտահերթ նիստում ՀՀ մրցակցության պաշտպանության հանձնաժողովի նախագահ Գեղամ Գեւորգյանն առաջին ընթերցմամբ քննարկման է ներկայացրել վերոնշյալ նախագծերի փաթեթը:
Նշվել է, որ ներկայումս ակցիա իրականացնողների գործողություններում նկատվում են խնդիրներ՝ պայմանավորված ակցիայի վերաբերյալ օրենսդրական կարգավորումների բացակայությամբ, որոնց պայմաններում վաճառողների եւ ծառայություններ մատուցողների կողմից իրականացվող մարկետինգային միջոցառումների ընթացքում հանդիպում են հասարակությանը ենթադրյալ մոլորեցման դրսեւորումներ, որով էլ պայմանավորված է նախագծերի փաթեթի ընդունումը:
Գեղամ Գեւորգյանի հավաստմամբ՝ առեւտրի եւ ծառայությունների իրականացման գործընթացում սոցիալական մեծ դեր ունեն ակցիաները, զեղչերը եւ այլ մարկետինգային գործունեության միջոցառումները, որոնք սպառողներին (գնորդներին) հնարավորություն են ընձեռում ապրանքները ձեռք բերել կամ ծառայությունները ստանալ առավել գրավիչ եւ շահեկան պայմաններով:
Կարդացեք նաև
Ըստ Մրցակցության պաշտպանության հանձնաժողովի նախագահի՝ նախագծերի ընդունումով ակնկալվում է, որ կկարգավորվեն ակցիայի հասկացությունը եւ տեսակները, զեղչի հասկացությունը եւ կիրառման պայմանները, այդ թվում՝ ժամկետային սահմանափակումը, ապրանքի իրացման կամ ծառայության մատուցման գնի փոփոխման հետ չկապված այլ միջոցառումներին ներկայացվող պահանջները եւ կիրառման պայմանները, ակցիայի մասին իրազեկմանը ներկայացվող պահանջները, մասնավորապես, ակցիայի վերաբերյալ տեղեկատվության հրապարակման, դրա դադարեցման պայմանները, հարկային օրենսդրության իմաստով «զեղչի» բովանդակությունը:
Հիմնական զեկուցողը տեղեկացրել է, որ ԱԺ աշխատակազմից ներկայացվել են առաջարկություններ, որոնց մի մասն ընդունվել է:
Պատգամավորների հարցերը հիմնականում առնչվել են զեղչ հասկացությանը, զեղչերի կիրառմանն ու սպառողների շահերի պաշտպանությանը:
ՀՀ մրցակցության պաշտպանության հանձնաժողովի նախագահ Գեղամ Գեւորգյանը նշել է, որ իրենց նպատակը սպառողների եւ տնտեսվարողների միջեւ վստահության միջավայրի վերականգնումն է:
Քննարկման արդյունքում հանձնաժողովականները նախագծերի փաթեթին տվել են դրական եզրակացություն:
ԱԺ
