4 տարի առաջ՝ 2018-ի մարտին «Նուբարաշեն» քրեակատարողական հիմնարկի մուտքի մոտ հերթապահ մասի պետ, մայոր Արմեն Հովհաննիսյանի և կալանավոր Արմեն Աղաջանյանի միջև վիճաբանություն է սկսվել: 30-ամյա տղային բարև չտալու համար «Նուբարաշեն» քրեակատարողական հիմնարկի աշխատակիցները դաժան ծեծի են ենթարկել։
Աղաջանյանի մայրը՝ Գայանեն, նշում է՝ տղան «Նուբարաշեն» ՔԿՀ էր տարվել ակնհայտ առողջական խնդրով: Կալանավորվելուց 6 ամիս առաջ վիրահատել են նրա աղիքը: Մայրը Աղաջանյանի վնասվածքները տեսել է դատարանում: «Նուբարաշեն» ՔԿՀ-ում տեղի ունեցածի առիթով Հատուկ քննչական ծառայությունում քննություն է սկսվել։ Առերեսման ժամանակ Արմեն Աղաջանյանը ճանաչել է իրեն ծեծի ենթարկած մայոր Արմեն Հովհաննիսյանին։ Աղաջանյանին Նուբարաշեն ՔԿՀ-ից տեղափոխել են «Հոգեկան առողջության պահպանման ազգային կենտրոն։
Օրեր անց նրա մարմինը գտել են կենտրոնի լոգարանում կախված։ Ըստ պաշտոնական վարկածի՝ նա ինքնասպան է եղել, սակայն Աղաջանյանի մայրը պնդում է՝ նրան սպանել են։ Դեպքի առթիվ հարուցված քրեական գործով ամբաստանյալի աթոռին հայտնվել է մայոր Արմեն Հովհաննիսյանը․ նրան մեղադրանք է առաջադրվել խոշտանգման, պաշտոնեական կեղծիք կատարելու հոդվածներով։ Դատական քննության արդյունքում Երևան քաղաքի ընդհանուր իրավասության դատարանի դատավոր Դավիթ Բալայանը խոշտանգման հոդվածը վերաորակել է որպես լիազորությունների անցում:
Արմեն Հովհաննիսյանի նկատմամբ վերջնական պատիժ է նշանակվել ազատազրկում՝ 4 տարի ժամկետով: Միաժամանակ, Ա. Հովհաննիսյանի նկատմամբ կիրառվել է համաներում, և նա ազատ է արձակվել հենց դատարանի դահլիճից: Վերաքննիչ քրեական դատարանը, երկրորդ անգամ քննելով «Նուբարաշեն» ՔԿՀ աշխատակից, գործով անցնող ամբաստանյալ Արմեն Հովհաննիսյանի դատավճռի դեմ տուժող կողմի և Դատախազության բողոքները, որոշում կայացրեց բավարարել դրանք։ Համաներմամբ ազատ արձակված Հովհաննիսյանը դատապարտվեց 7 տարի 6 ամիս ժամկետով ազատազրկման։
Կարդացեք նաև
Տուժող կողմի իրավահաջորդի ներկայացուցիչ Արա Ղարագյոզյանի խոսքով՝ այս որոշումը նախադեպային է։ Դա հիմք է տալիս պնդելու, որ խոշտանգման գործերն այսուհետ չեն կարող կոծկվել, և անպատժելիության դեպքերը կնվազեն։ «Սա ոչ թե հաղթանակ է, այլ արդարություն։ Արդարադատության փակ դուռը բացվեց»,- ընդգծում է Աղաջանյանի մայրը։
Այս տեսանյութը պատրաստվել է Հանրային լրագրության ակումբի «Մեդիա կենտրոն» ծրագրի շրջանակում՝ Բաց հասարակության հիմնադրամներ – Հայաստանի աջակցությամբ:
ՀԼԱ ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ
