Դեմիրճյան փողոցի՝ Բաղրամյան պողոտայի հետ հատվող կետում վահաններով ոստիկաններն այս պահին շարք կազմած փակել են խորհրդարանի՝ Դեմիրճյան փողոցում գտնվող մուտք տանող հատվածը։ Դիմադրության շարժումն իր համակիրներով գալու է ազգային ժողովի դիմաց։ Տարածքում մեծաթիվ ոստիկանական ուժեր են կուտակվում։
«Քաղաքացիական պայմանագիր» խմբակցությունը ԱԺ փոխխոսնակներից Իշխան Սաղաթելյանին եւ պատգամավոր Վահե Հակոբյանին պաշտոնազրկելու գործընթաց է սկսել․ հարցը քննարկվելու է այսօր՝ ԱԺ արտահերթ նիստում։ Խոսքն Իշխան Սաղաթելյանին ԱԺ նախագահի տեղակալի պաշտոնից հետ կանչելու եւ «Հայաստան» խմբակցության պատգամավոր Վահե Հակոբյանի՝ որպես տնտեսական հարցերի մշտական հանձնաժողովի նախագահի լիազորությունների դադարեցման մասին է։
Ըստ մամուլում առկա տեղեկությունների՝ հիմնավորման մեջ նշվում է, որ Վահե Հակոբյանը չի մասնակցել քվեարկությունների, ԱԺ խորհրդի եւ իր ղեկավարած հանձնաժողովների նիստերի մեծ մասին։
Իշխան Սաղաթելյանն էլ, ըստ հիմնավորման, մեծամասամբ բացակա է եղել ԱԺ խորհրդի նիստերից, բացի այդ՝ նա, որպես ԱԺ փոխնախագահ, ներկայացնում է ողջ խորհրդարանը եւ ի պաշտոնե կոչված է ապահովել ԱԺ աշխատանքը, հանրային համերաշխությունը, մինչդեռ հրահրել է բախումներ, օգտագործել ատելության խոսք եւ վիրավորական արտահայտություններ ԱԺ պատգամավորների հասցեին։
Կարդացեք նաև
Լուիզա ՍՈՒՔԻԱՍՅԱՆ
