«Այս պահի դրությամբ տարհանման աշխատանքներ չեն իրականացվում։ Խոսակցությունները, որ ասել են, թե ժամանակ է նրանց տրված․․․ես խոսել եմ համայնքների ղեկավարների հետ։ Տեղեկություն չկա, որ ասել են՝ տարհանվեք»,-«Արցախի արդի մարտահրավերները․ Բերձորի հանձնում, նոր պատերա՞զմ» խորագրով հանրային-մասնագիտական քննարկման ժամանակ այսօր անդրադառնալով հարցին, թե Բերձորի միջանցքի՝ Ադրբեջանին հանձնելու պարագայում ի՞նչ է լինելու Բերձորի, Աղավնոյի եւ Սուսի բնակիչների ճակատագիրը, որոնք չեն ցանկանում բնակավայրը լքել, ասաց Արցախի ՄԻՊ Գեղամ Ստեփանյանը։
Նա նշեց․ «Հարցը բարդ է։ Առաջնահերթ, արցախյան իշխանությունը պետք է տեր կանգնի իր քաղաքացիների ճակատագրին։ Հնարավոր չեմ համարում իրավիճակ, որ այդ մարդիկ պատանդառության մեջ հայտնվեն ադրբեջանցիների մոտ։ Թե ինչպես դա կկազմակերպվի, կտեսնենք Արցախի իշխանության աշխատանքում։ Առաջնային պարտավորությունն իշխանությունն է կրում։ Բերձորի եւ Աղավնոյի բնակիչներն իրավական առումով օգտվում են բոլոր այն արտոնություններից, որոնք սահմանված են տեղահանվածների համար»։
Պաշտպանի խոսքով՝ տարհանման պարագայում Արցախի իշխանությունները պետք է նաեւ ապահովեն բնակարանների հարցը․ «Հնարավոր է, որ եթե նոր ճանապարհի փոփոխությունը լինի, Աղավնոյի բնակչությունը կտեղավորվի Հին շեն եւ Մեծ շեն համայնքներում, իսկ բերձորցիների դեպքում գործելու են մյուս տեղահանվածների համար սահմանված ծրագրերը։ Քաշաթաղցիների համար ՀՀ-ում բնակարան ձեռք բերելու հնարավորություն կա՝ արտոնյալ վարկային պայմաններով, ինչը խնդրահարույց է, օրինակ, սահմանված գումարի, կանխավճարի տեսանկյունից»։
Կարդացեք նաև
Հիշեցնենք, որ Ադրբեջանն այս ընթացքում Բերձորի միջանցքը շրջանցող նոր ճանապարհի կառուցումը հասցնում է ավարտին։ Բերձորի միջանցքի հայաթափման վերաբերյալ Արցախի նախագահի այսօրվա պարզաբանումները՝ այստեղ։
Լուիզա ՍՈՒՔԻԱՍՅԱՆ
