2020թ․ պատերազմից հետո Արցախից դեռեւս 33 անհետ կորած զինծառայող եւ 20 քաղաքացիական անձինք կան։ Այս մասին այսօր «Համախմբում» շարժման նախաձեռնած քննարկման ժամանակ հայտարարեց Արցախի ՄԻՊ Գեղամ Ստեփանյանը։ Նրա փոխանցմամբ՝ մինչեւ օրս Ադրբեջանի կողմից 38 գերու մասին տեղեկություն կա հաստատված, մինչդեռ առնվազն 80 զինծառայողի եւ քաղաքացու մասին միջազգային ատյաններում հայկական կողմը տվյալներ է ներկայացրել։
«Ադրբեջանական կողմը դիտավորյալ տեղեկություններ չի փոխանցում այդ անձանց ճակատագրի մասին։ Ինչ վերաբերում է հումանիտար ճգնաժամին, ապա պատերազմից հետո ավելի քան 90 000 մարդ տեղահանվել է, մի մասը հիմա Արցախում է բնակվում․ 15 000 մարդ անօթեւան է, 22․000 անօթեւաններ դեռեւս ՀՀ-ում են գտնվում»,-տեղեկացրեց Գեղամ Ստեփանյանը։
Նրա խոսքով․ «Հումանիտար աղետի՝ հրատապ լուծում պահանջող խնդիրներից մեկը տեղահանվածների բնակարանով ապահովության հարցն է։ Որոշակի աջակցության ծրագրեր կան, սակայն ՀՀ-ում գտնվողները բնակարանի փոխհատուցման աջակցություն չեն ստանում, իսկ Արցախում գտնվողները ցածր աջակցություն են ստանում, քան շուկայում առկա գներն են, ինչը լուրջ խնդիր է առաջացնում տեղահանվածների համար, որոնք աշխատանքն են կորցրել․ գյուղատնտեսությամբ զբաղվելու նրանց հնարավորությունը խիստ սահմանափակ է, ստիպված վարձակալությամբ են ապրում, բայց պետության տրամադրած գումարները համապատասխան չեն շուկայի գներին»։
Կարդացեք նաև
ՄԻՊ-ը նաեւ հայտնեց, որ այս տարվա հուլիսից Արցախում ամեն տեղահանվածի տրվելու է 40 000 դրամ՝ բնակվարձի համար․ «Չորս հոգանոց ընտանիքի դեպքում գումարը բավարար կլինի՝ բնակարանի խնդիրը լուծելու համար։ Հյուրատներում մնացողների թիվը մոտ 3000 է»։
Կրթության ոլորտում եւս, պաշտպանի փոխանցմամբ, խնդիրներ կան․ «Մոտ 8000 աշակերտներ տեղահանվածի կարգավիճակ ունեն։ Հաճախ երեխաները դասի են նստում գերծանրաբեռնված դասարաններում։ Շուշիի եւ Հադրութի դպրոցների աշակերտները երկրորդ հերթով դասապրոցեսն անցնում են Ստեփանակերտի դպրոցներում։ 125 դպրոց եւ 18 մանկապարտեզ ենք կորցրել պատերազմի հետեւանքով»։
Լուիզա ՍՈՒՔԻԱՍՅԱՆ
