Արարատի մարզի Այգեվան գյուղի այգետեր Մհեր Քոչարյանն օրեր առաջ տոննաներով ծիրանը քաղել էր, բարձել ավտոմեքենաները, բայց արտահանողները զանգեցին՝ ասացին Լարսը փակ է։
«300-350 դրամով տանում էին, տակը թափվելուց հո լա՞վ է։ Մի քանի օր առաջ էլ ուժգին քամին բերքը լցրեց ծառերի տակ եւ այդ թափված բերքը ստիպված եղանք 80-100 դրամով վաճառել՝ 300 դրամանոց ընտիր ծիրանը։ Եվ դրանից հետո էլ հանկարծ հայտարարվեց, որ Լարսը փակվել է։ Հավաքած բերքը մնաց այգում»,-Aravot.am-ի հետ զրույցում ասում է Մհեր Քոչարյանը։
Չնայած լարված իրավիճակին՝ կատակում է՝ «խնդիրը խնդրի հետեւից, հասած ծիրանի նման գյուղացու գլխին է լցվում»։
Մցխեթա-Ստեփանծմինդա-Լարս միջպետական ավտոճանապարհը, չնայած, կարճ ժամանակով էր փակ, բայց այգետերերը խուճապի էին մատնվել։
Կարդացեք նաև
Արմաշ գյուղի այգետեր Տիգրան Մաթեւոսյանը 2,7 հեկտար հողատարածք ունի: Արտահանող ընկերությունների հետ չի աշխատում, որովհետեւ իրենց առաջարկած գումարով ծիրան վաճառելը ծախսերը չի փակում։ Տիգրանը 10 մլն վարկ է վերցրել՝ այգի ձեռք բերել, իսկ այս տարվա բերքը ընդամենը մեկ միլիոնն է փակել։ 12 աշխատող ունի, յուրաքանչյուրին վճարում է 10 000 դրամ: Հոգում է նաեւ սննդի հարցը, որը մեկ օրվա հաշվով կազմում է 16000 դրամ: Վաճառված ծիրանն էլ 110 000 դրամ է կազմել, ստացվում է՝ վնասով է աշխատել։
Գյուղացիների հույսը կառավարությունն է՝ ակնկալում են «ինչ-որ խելացի որոշում, որպեսզի «տակ» չտան։
Նրանք մտահոգ են՝ ինչպես են մարելու վարկերը, ծիրանն արդեն փչանում է, ու արդեն ստիպված են 40 դրամով վաճառել։
Արմեն ԴԱՎԹՅԱՆ
