Խորհրդարանը հունիսի 29-ին գումարված արտահերթ նստաշրջանում քննարկել է Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորի թափուր տեղի համար առաջադրված թեկնածուի ընտրության հարցը:
Բարձրագույն դատական խորհուրդն այդ պաշտոնում առաջադրել է Ռուբիկ Հրանտի Մխիթարյանի, Արսեն Սերժիկի Նիկողոսյանի եւ Արթուր Պարգեւի Սարգսյանի թեկնածությունները:
Թեկնածուների կենսագրություններն ու աշխատանքային ուղին ներկայացրել է Բարձրագույն դատական խորհրդի անդամ Դավիթ Խաչատուրյանը:
Թեկնածու Ռուբիկ Մխիթարյանն իր տեսլականն է ներկայացրել Վճռաբեկ դատարանի հակակոռուպցիոն պալատի դերի եւ նշանակության վերաբերյալ, անդրադարձել կառույցից հանրության սպասելիքներին, մասնագիտացված դատարանների կարեւորությանը:
Կարդացեք նաև
Մյուս թեկնածուն՝ Արսեն Նիկողոսյանը, նշել է, որ կոռուպցիան ծանր հիվանդություն է, որի դեմ պետք է մղել անզիջում պայքար: Նա նաեւ նկատել է, որ անհրաժեշտ է զերծ մնալ գայթակղությունից: Թեկնածուն կարեւոր է համարել Վճռաբեկ դատարանի դերն ու նշանակությունը կոռուպցիայի դեմ պայքարում:
Շեշտադրվել է այն հանգամանքը, որ առաջին անգամ Հակակոռուպցիոն պալատը ձեւավորվելու է ընտրությունների միջոցով:
Թեկնածու Արթուր Սարգսյանն ընդգծել է կոռուպցիայի դեմ պայքարում Հակակոռուպցիոն պալատի կարեւոր դերակատարությունը: Ըստ նրա՝ Վճռաբեկ դատարանը պետք է վերանայի այն դատական ակտերը, որոնք խաթարել են արդարադատությունը: Կարեւորվել է դատավորների համալրումը, ինչը հնարավորություն կտա թեթեւացնել դատարանների ծանրաբեռնվածությունը:
Արթուր Սարգսյանը կարեւոր է համարել արդարադատության նկատմամբ հանրության վստահության վերականգնումը:
Ազգային ժողովը հունիսի 30-ին՝ ժամը 11:00-ին, կշարունակի արտահերթ նստաշրջանի աշխատանքը:
ՀՀ ԱԺ ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ
