Խորհրդարանը հունիսի 29-ին գումարված արտահերթ նստաշրջանի ընթացքում քննարկել է Վճռաբեկ դատարանի հակակոռուպցիոն պալատի կոռուպցիոն հանցագործությունների քննության դատական կազմի դատավորի թափուր տեղի համար առաջադրված թեկնածուի ընտրության հարցը:
Բարձրագույն դատական խորհուրդն այդ պաշտոնում առաջադրել է Հովհաննես Ռաֆիկի Ավագյանի, Կարեն Ալբերտի Բիշարյանի եւ Նելլի Նիկողոսի Հարությունյանի թեկնածությունները:
Թեկնածուների կենսագրություններն ու աշխատանքային ուղին ներկայացրել է Բարձրագույն դատական խորհրդի անդամ Դավիթ Խաչատուրյանը:
Թեկնածու Հովհաննես Ավագյանն անդրադարձել է Հակակոռուպցիոն պալատի ապագա գործունեությանն ու անելիքներին՝ նշելով, որ հստակ գիտակցում է կոռուպցիայի դեմ հաստատակամ եւ անզիջում պայքար մղելու կարեւորությունը:
Կարդացեք նաև
Թեկնածուն նշել է, որ երբեւէ չի զբաղվել քաղաքականությամբ, չի եղել որեւէ կուսակցության անդամ: «2015 թ. իրականացնելով դատավորի առաքելություն՝ բոլոր դատական ակտերը կայացնելիս ղեկավարվել եմ բացառապես ՀՀ Սահմանադրությամբ, օրենքներով եւ իմ խղճով»,- ընդգծել է նա եւ հավելել, որ ընտրվելու դեպքում կրկնապատկելու է ջանքերը՝ դատավորի բարդ առաքելությունն իրականացնելիս:
Մյուս թեկնածուն՝ Կարեն Բիշարյանը, խոսել է արդարադատություն իրականացնելիս արդար գործելու գաղափարաբանական այն հենքի մասին, որով պետք է առաջնորդվի ՀՀ արդարադատության համակարգի ցանկացած ատյանի դատավոր: Թեկնածուի խոսքով՝ քրեական արդարադատության ոլորտի, այդ թվում՝ Վճռաբեկ դատարանի դատավորի համար իր առաքելության կարեւոր պայմաններ են՝ առաջնորդվել բացառապես իրավունքի շահով, ինչպես նաեւ ապահովել հանրային եւ մասնավոր շահերի արդարացի հավասարակշռությունը:
Թեկնածու Նելլի Հարությունյանը կարեւորել է կոռուպցիայի դեմ պայքարը՝ անդրադառնալով հանրապետությունում իրականացվող հակակոռուպցիոն քաղաքականությանն ու օրենսդրությանը: «Դատական համակարգը պետք է լիարժեք անկախ լինի, որպեսզի կարողանա հավասարակշռող ուժ դառնալ մյուս ուժերին»,- ընդգծել է նա:
Թեկնածուն նաեւ նշել է, որ այս դժվար ժամանակահատվածում պատրաստ է ծառայել հայրենիքին:
ՀՀ ԱԺ ՄԱՄՈՒԼԻ ՀԱՂՈՐԴԱԳՐՈՒԹՅՈՒՆ
