Կոռուպցիայի դեմ պայքարի տեմպերի մասին այսօր խորհրդարանում իշխող ուժի կողմից ներկայացված գլխավոր դատախազի թեկնածու Աննա Վարդապետյանին հարց տվեց ՔՊ-ական պատգամավոր Արեն Մկրտչյանը՝ նկատելով, որ 2018-ի ապրիլ-մայիսին հազարավոր քաղաքացիներ արդարության վերականգնման պահանջով էին փողոց դուրս եկել եւ «ձեւակերպված պահանջներից մեկը՝ հարստահարված, թալանված միջոցների վերադարձն էր պետական բյուջե», սակայն անցել է չորս տարի եւ իշխանությանն ուղղվող ամենասուր քննադատությունները հենց այդ դաշտում են: Պատգամավորը կարծել է, որ ապօրինի ծագման գույքի բռնագանձման մասին օրենքը բեկում պետք է մտցնի, սակայն այդպես չի եղել: Նա հետաքրքրվեց՝ ի՞նչ արդյունավետությամբ է աշխատում շուրջ երկու տարի գործարկված օրենքը, գուցե կարողությունների ավելացման խնդիր կա, քանի որ հարուցված շուրջ 300 քրեական գործ կա, որից 11-ը դատարանում են, որքա՞ն պետք է քաղաքացիները սպասեն արդյունքի:
Աննա Վարդապետյանը պատասխանեց, որ այս ժամանակն անհրաժեշտ էր համապատասխան օրենսդրական դաշտ ձեւավորելու համար, որտեղ էական է հենց ապօրինի ծագման գույքի բռնագանձման մասին օրենքը : Նա նկատեց, որ Վրաստանը գնաց առաջին հայացքից ֆուրոր առաջացնող՝ նվիրատվությունների ճանապարհով, բայց այդ գործերը բավական վիճելի էին եւ ի վերջո դատական վեճերի առարկա դարձան: Ձեւավորվում է նաեւ հակակոռուպցիոն դատարանը եւ բեկումը պայմանավորված է լինելու ոչ թե Աննա Վարդապետյանի անձով, այլ այս գործընթացներով, որոնք հասել են այն փուլի, որ արդեն պետք է աշխատել. «Ապօրինի ծագման գույքի մասով, մենք ունենք այն ելակետը, որ արդեն պետք է աշխատել, մենք արդեն չունենք այն պատճառաբանությունները, որ սա է պետք, նա է պետք» :
Նելլի ԳՐԻԳՈՐՅԱՆ
