Այսօր ԱԺ արտահերթ նիստին, որի ժամանակ պետք է ընտրեն Վճռաբեկ դատարանի դատավորներ, Վարչական պաղատի դատավոր, սկզբում քվորում չկար: Գրանցվել էր 45 պատգամավոր, քվորում լինելու համար անհրաժեշտ է 54: Նիստը վարող ԱԺ փոխխոսնակ Հակոբ Արշակյանն ասաց, որ տեխնիկական խնդիրներ կան, հորդորեց եւս մեկ անգամ գրանցվել: Երկրորդ փորձի ժամանակ 52 պատգամավոր էր գրանցվել: Հակոբ Արշակյանը հորդորեց պատգամավորներին զբաղեցնել տեղերը ու նորից նախապատրաստվել գրանցման: Երրորդ փորձից հետո ստացվեց: Գրանցվեց 64 պատգամավոր:
Վճռաբեկ դատարանի պալատների թիվը ավելացել է ու այդ պալատներում դատավորի թափուր հաստիքներ են առաջացել: ԲԴԽ անդամ Դավիթ Խաչատրյանը ներկայացրեց Վճռաբեկ դատարանի դատավորի թեկնածու Հրաչ Այվազյանին (լուսանկարում), որը Վարչական դատարանի նախագահն է:
ՔՊ պատգամավոր Հերիքնազ Տիգրանյանը թեկնածու Հրաչ Այվազյանից հետաքրքրվեց դատարանների ծանրաբեռնվածությունից: Այվազյանը պատասխանեց, որ որքան վարչական մարմիների կողմից խնդիրները շատ են, այնքան դատարանները ծանրաբեռնվում են. «Նախկինում արդեն իսկ կատարված փոփոխությունների արդյունքում Ճանապարհային ոստիկանության վարչական ակտերի հետ կապված որոշման արդյունքում դատարաների բեռը որոշ չափով թեթեւացել է: Մյուս ոլորտներում էլ կարելի է նմանատիպ որոշումներով բեռը թեթեւացնել»:
ՔՊ խմբակցության պատգամավոր Սերգեյ Բագրատյանը հարցրեց. «Դուք դատական համակարգում բարձր պաշտոն եք զբաղեցնում՝ դատարանի նախագահ եք ու ո՞րն է պատճառը, մոտիվացիան, որ այդ բարձր պաշտոնը ունենալու պարագայում գերադասում եք Վճռաբեկ դատարանի դատավոր աշխատել»:
Կարդացեք նաև
Այվազյանը պատասխանեց, որ բարձր դատարան արտահայտությունը ինքնին կարող է մոտիվացիա համարվել անձի համար, որ թեկուզ Վարչական դատարանում դատավորի պաշտոնը զբաղեցնելով՝ ձգտում ունենա ավելի բարձր դատական ատյանում պաշտոնավարելու ու իր ներդրումն ունենալու օրենսդրական առաջընթացին»:
Հռիփսիմե ՋԵԲԵՋՅԱՆ
