ԵԱՀԿ Մինսկի խումբը դադարեցրել է իր գործունեությունը ԱՄՆ-ի եւ Ֆրանսիայի նախաձեռնությամբ, այնուամենայնիվ, եվրոպացիներն ընդունում են, որ Հայաստանի եւ Ադրբեջանի միջեւ մնացած հարցերի կարգավորման հիմքը երեք երկրների (Ռուսաստան, Հայաստան, Ադրբեջան) առաջնորդների երեք հայտարարություններն են, հունիսի 24-ին հայտարարեց Ռուսաստանի արտգործնախարար Սերգեյ Լավրովը Ադրբեջանի իր գործընկեր Ջեյհուն Բայրամովի հետ հանդիպմանը:
Այնուհետեւ, պատասխանելով հարցին, թե արդյոք ինքը կիսո՞ւմ է Ադրբեջանի նախագահ Իլհամ Ալիեւի կարծիքն այն մասին, որ անհրաժեշտ է հրաժեշտ տալ Մինսկի խմբին, Լավրովն ասել էր, որ ադրբեջանցի գործընկերոջ հետ բանակցությունների ընթացքում այդ հարցին չեն անդրադարձել: «Մենք չենք քննարկել Մինսկի խումբը որպես այդպիսին, քանի որ այն դադարեցրել է իր գործունեությունը ֆրանսիացի եւ ամերիկացի մասնակիցների նախաձեռնությամբ: Բայց հետպատերազմյան կարգավորման գործընթացները մենք, իհարկե, քննարկել ենք: Եվ այս նոր գործընթացների համար հիմքը Ռուսաստանի, Ադրբեջանի եւ Հայաստանի ղեկավարների երեք եռակողմ հայտարարություններն են»,- նշել է Լավրովը:
Aravot.am-ի հարցին, թե ինչպես կմեկնաբանեք ՌԴ արտգործնախարարի վերոնշյալ հայտարարությունը, արտակարգ լիազոր դեսպան, ՀՀ Նախագահի նախկին հատուկ հանձնարարություններով դեսպան Դավիթ Շահնազարյանը մեկ նախադասությամբ պատասխանեց. «ԵԱՀԿ Մինսկի խմբի վախճանի մասին լուրերը չափազանցեցված են»:
Հիշեցնենք, որ այս տարվա փետրվարի 10-ին Դավիթ Շահնազարյանը հայտարարել էր․
Կարդացեք նաև
«Հայաստանի ընդդիմադիր բոլոր ուժերը պետք է երեք կետից բաղկացած հայտարարություն անեն՝
- Անհապաղ դադարեցնել Հայաստան-Թուրքիա հարաբերությունների հաստատման և սահմանների բացման գործընթացը:
- Լեռնային Ղարաբաղի կարգավիճակի հարցը, Շուշիի և Հադրութի շրջանների դեօկուպացիան, հաղորդակցական, տրանսպորտային ապաշրջափակումը, դելիմիտացիան պետք է լուծվեն բացառապես ԵԱՀԿ ՄԽ շրջանակներում: Արցախի Հանրապետությունը չի լինելու Ադրբեջանի կազմում:
- Հայաստանի գործող իշխանությունները չեն ներկայացնում Հայաստանի Հանրապետության շահերը, և նրանց գործունեությունը լրջագույն սպառնալիք է Հայաստանի անվտանգությանը, ինքնիշխանությանը և տարածքային ամբողջականությանը»:
Էմմա ԳԱԲՐԻԵԼՅԱՆ
