«Սա արդեն 4-րդ դատական նիստն է Ավետիք Չալաբյանի գործով այս ամսվա ընթացքում, շաբաթական երկու նիստ ենք ունենում, բոլոր նիստերը վերջանում են նույն արդյունքով: Մենք, անկեղծ ասած, արդեն շատ սպասելիքներ չունենք այս դատական նիստերից, բայց մենք, համենայնդեպս, բոլոր իրավական քայլերն անում ենք: Երեւում է, որ սա ակնհայտորեն քաղաքական հետապնդում է: Դատավորը տեղափոխեց նիստերը մի ամիս ավելի ուշ, այն տպավորություն էր, որ ասես խուսափեր այսօր որոշում կայացներ»,- այսօր լրագրողների հետ զրույցում ասաց «Համախմբում» նախաձեռնության անդամ Ավետիք Չալաբյանի կինը՝ Անահիտ Ադամյանը:
Հիշեցնենք, որ այսօր Երեւանի ընդհանուր իրավասության դատարանում դատավոր Արմեն Շիրոյանի նախագահությամբ քննվում էր Ավետիք Չալաբյանի խափանման միջոց կալանքը փոխելու հարցը:
Հիշեցնենք, որ 2022թ․ մայիսի 12-ին Ավետիք Չալաբյանի նկատմամբ սկսվել է քրեական հետապնդում ՀՀ քրեական օրենսգրքի 163-րդ հոդվածի 3-րդ մասի 2-րդ կետով, որը նախատեսում է պատասխանատվություն հավաքին մասնակցելուն հարկադրելը կամ հավաքին մասնակցելու կամ հավաքին մասնակցելուց հրաժարվելու նպատակով նյութապես շահագրգռելու համար՝ կատարված երկու կամ ավելի անձանց նկատմամբ:
Կարդացեք նաև
Հարցին՝ դուք ասում եք, որ սա շինծու գործ է, բայց կա ձայնագրություն, որը որպես փաստ են ներկայացնում՝ Ադամյանը պատասխանեց, որ ձայնագրությունը մոնտաժված է. «Ակնհայտ դարձավ, որ կազմակերպված ձայնագրություն է դա նաեւ, ինչպես տեսնում ենք, շատ հեշտ է Հայաստանում քաղաքական գործիչներին կալանավոր, քաղբանտարկյալ ձեւաչափի մեջ դնել: Իշխանության կողմից դրա համար պրակտիկայում բոլոր քայլերն արվում են»:
Հարցրեցինք՝ կարծում եք, դատավորը ձգձգում է նիստերը, որովհետեւ «վերեւներից» հրահանգի՞ է սպասում, թե՞ ուրիշ պատճառ կա՝ նա պատասխանեց. «Նա այսօր որոշեց որոշում չկայացնել, չնայած հարցը բավականին պարզ էր, երաշխավորագրերը մերժվել էին ուղղակի պետք էր հասկանալ՝ ինչու են մերժվել, կա՞ որոշակի փաստարկ թե՞ չէ»:
Հռիփսիմե ՋԵԲԵՋՅԱՆ
