Մոսկվան կասկածում է, որ ԱՄՆ հայտարարությունը՝ ԵԱՀԿ Մինսկի խմբի շրջանակում աշխատելու պատրաստակամության մասին անկեղծ է: Այս մասին այսօր տեղի ունեցած ճեպազրույցում հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:
«Ես կցանկանայի ինձ թույլ տալ կասկածել Քարեն Դոնֆրիդի հայտարարության անկեղծության մեջ: Եթե Վաշինգտոնն ու Փարիզն իսկապես կարևոր համարեին Մինսկի խմբի բացառիկ միջնորդական ձևաչափը, ապա իրենց թույլ չէին տա արհամարհել բոլոր մասնակից պետությունների կողմից հավանություն ստացած մանդատը»,- ասել է Զախարովան:
Ավելի վաղ ԱՄՆ պետքարտուղարի՝ Եվրոպայի և Եվրասիայի հարցերով տեղակալ Քարեն Դոնֆրիդն ասել էր, որ թեև ԱՄՆ-ը խզել է կապերը Ռուսաստանի հետ, բայց պատրաստ է շարունակել գործակցությունը ԵԱՀԿ Մինսկի խմբի շրջանակում:
Զախարովայի խոսքով՝ ԱՄՆ-ը և Ֆրանսիան փետրվարի 24-ին միակողմանիորեն, առանց խորհրդակցությունների խզել են կապերը Մինսկի խմբի ռուս համանախագահի հետ: Այդպիսով, ըստ Զախարովայի, եռանախագահների աշխատանքներին անուղղելի հարված է հասցվել:
Կարդացեք նաև
«Չկա երաշխիք, որ նման անպատասխանատու գործողությունները չեն կրկնվի: Ձևացնել, թե ոչինչ տեղի չի ունեցել, պարզապես չի ստացվի: Պետք է հաշվի նստել նոր իրողությունների հետ»,- ասել է Զախարովան:
Ըստ Զախարովայի, ԱՄՆ-ը և Ֆրանսիան այնպես էին հաշվարկել, որ Ռուսաստանին կմեկուսացնեն, բայց սխալվեցին իրենց հաշվարկներում և «իրենք իրենց մեզնից մեկուսացրին», մինչդեռ արտաքին աշխարհը չի սահմանափակվում Եվրատլանտիկայով:
Ռուսաստանի ԱԳՆ ներկայացուցիչը կրկնել է, որ իրենք շահագրգռված են Ադրբեջանի և Հայաստանի հարաբերությունների կարգավորման գործում և չեն կարող թույլ տալ, որ «առանձին արտաքին դերակատարների քաղաքականացված քայլերը» խաթարեն տարածաշրջանում կայունության և խաղաղության վերականգնման՝ առանց այդ էլ բարդ ջանքերը:
«Հետագայում էլ մեզնից կախված ամեն ինչ կանենք՝ լիարժեք իրականացնելու այն պարտավորություններն ու առաջադրանքները, որոնք արձանագրվել էին երեք երկրների առաջնորդների հայտարարություններում»,- ասել է նա:
Պատրաստեց Վիկտորյա ԱՆԴՐԵԱՍՅԱՆԸ
