Շիրակի մարզպետ Նազելի Բաղդասարյանն այսօր Գյումրու քաղաքապետարանում անցկացրած խորհրդակցության ժամանակ անդրադարձ կատարեց նաև Գյումրու նախկին քաղաքապետ Վարդան Ղուկասյանի կողմից կենտրոնական զբոսայգին «զավթելուն» ու նաև նույն անձի կողմից Գյումրու կենտրոնական Սայաթ-Նովա փողոցի հատվածի զբոսայգում շինարարություն ծավալելուն։
Շիրակի մարզպետն անուն չհնչեցրեց, սակայն ասաց, որ բոլորն էլ գիտեն ում ձեռքով է այս ամենը կատարվում։ Նա նախազգուշացրեց, որ արտոնյալներ չպիտի լինեն Գյումրի քաղաքում։
Մարզպետը տեղեկացրեց, որ «Թումո» ընկերությունը մեծ ծրագիր է նախատեսել իրականացնել այգում, Եվրամիությունը ևս հետաքրքրություն ունի։
Շիրակի մարզպետ ներկայացմամբ, նախօրեին հանդիպել է Եվրամիության դեսպան Անդրեա Վիկտորինի հետ, քննարկել են ծրագրում հնարավոր այլ միջոցներ ներգրավելու, այդ թվում և խոհարարական դպրոցը կյանքի կոչելու հարցը։
Կարդացեք նաև
Հիշեցնենք, որ «Թումոյին» տրամադրվել է Գյումրու քաղաքային ժողովրդական տան շենքը, որտեղ 1912 թվականին՝ առաջին անգամ բեմադրվել է «Անուշ» օպերան»։ Այգու տարածքը բարեկարգման նպատակով ևս հանձնվել է «Թումոյին»։
«Պարոն քաղաքապետ, այս առումով ես խիստ դժգոհ եմ, որ Գյումրու կենտրոնական զբոսայգին, որը ժամանակին ապօրինաբար զավթվել է որոշ մարդկանց կողմից, որոնք քաղաքային իշխանությունում դերակատարություն են ունեցել, մենք այս տարածքները չենք կարողանում ազատագրել։
Ես, այնուամենայնիվ, նշեմ, որ հարցը համայնքապետարանի ուշադրության կենտրոնում պիտի լինի, որովհետև կենտրոնական զբոսայգին ինչ-որ մեկի սեփականությունը չի կարող լինել, որ այլանդակության մակարդակի հասնող ապօրինություններ իրականացնի այնտեղ։
Ե՛վ կենտրոնական զբոսայգին և՛ Սայաթ- Նովայի տարածքի հարող զբոսայգին, ես չգիտեմ որքանով փոխկապակցված են այդ երկու հատվածները և գործ անող մարդիկ, բայց ես, ինչպես և դուք՝ ներկաներդ, ապրում են այս քաղաքում և գիտենք ով, ինչպես և ում ձեռամբ է արվում։
Ամեն դեպքում և՛ ես, և՛ պարոն քաղաքապետը հետևողական ենք եղել, որ Սայաթ-Նովայի զբոսայգու հատվածը իրավական գործընթացներ ունենա, և քաղաքապետի կողմից գրություն է ուղարկվել դատախազություն։ Չի կարող Գյումրի քաղաքում լինել մեկը՝ մականունավոր, թե ոչ, որը ապօրինություններ կիրականացնի։ Քանի դեռ ես Շիրակի մարզպետ եմ, ցանկացած ապօրինության հետևից գնալու եմ՝ հետքերով», -ասաց Նազելի Բաղդասարյանը։
Գյումրու քաղաքապետ Վարդգես Սամսոնյանն իր հերթին խոստացավ Գորկու զբոսայգին վերադարձնել գյումրեցիներին, դարձնել ժամանցի կենտրոն։
Նունե ԱՐԵՎՇԱՏՅԱՆ
