Այսօր Երեւանի քաղաքապետարանում տեղի ունեցած ավագանու նիստում որոշում ընդունվեց քաղաքապետարանի Մարդկային ռեսուրսների վարչությունում աշխատակիցների թիվը կրճատել: Ըստ այդմ՝ 15 աշխատակցից կմնա 12-ը։
Նշվեց, որ կներդրվի էլեկտրոնային հարթակ եւ ըստ նախագծի, խնայված միջոցների ծավալը կկազմի տարեկան մոտ 8 միլիոն դրամ:
Միքայել Մանրիկյան
Արձագանքելով այս նախագծին, ավագանու ԲՀԿ խմբակցության ղեկավար Միքայել Մանրիկյանը նշեց, որ կրճատման դեպքում հաճախ ազատում են փորձառու եւ արհեստավարժ մասնագետներին եւ փոխարենը նշանակում անտեղյակ մարդկանց։ Ապա՝ հարց ուղղեց՝ ինչպե՞ս են վարվելու, հեռացնելու են այն մարդկանց, որոնք անցանկալի՞ են եւ ընդունելու են այնպիսիներին, որոնք ցանկալի կադրեր են:
Կարդացեք նաև
Ի պատասխան, հարցը զեկուցողը նշեց, որ համայնքային ծառայողը պաշտպանված է օրենքով եւ համայնքային ծառայողին հենց այնպես, ինչ-որ մեկի կամայականությամբ չեն կարող աշխատանքից ազատել: Իսկ նրանց, ում պետք է ազատեն, ունեն հիմնավոր, ծանրակշիռ հիմքեր:
Քաղաքապետ Հրաչյա Սարգսյանը նշեց, որ Երեւանի քաղաքապետարանին կից գործելու են քարտուղարություն 3 բաժիններ, որոնք նախատեսված են քաղաքացիներին սպասարկելու, ընդհանուր եւ արխիվային գործերի համար: Ըստ նրա՝ այստեղ կաշխատեն 59 քաղաքացիներ: Հրաչյա Սարգսյանի կարծիքով, այդ փոփոխությունը թույլ կտա քաղաքացիներին սպասարկել էլ ավելի բարձր մակարդակով։
Քաղաքապետն ասաց նաեւ, որ «Mulberry» համակարգի ներդրմամբ քաղաքապետարանի աշխատակիցների աշխատանքի արդյունավետության վերահսկողությունն ուժեղացել է։
Լուսինե ԲՈՒԴԱՂՅԱՆ
