«Ավետիք Չալաբյանի նման ամբասիր քաղաքական գործիչներ մեր հասարակությունում շատ չեն, վստահ կարելի է ասել, որ Ավետիք Չալաբյանը և նրա կարգի գործիչները պարզապես վտանգ են ներկայացնում Նիկոլ Փաշինյանի եւ նրա իշխանության համար, հատկապես այս ժամանակաշրջանում, երբ ակտիվ քաղաքական գործողություններ են իրականացվում»,- այսօր կայացած մամուլի ասուլիսում կարծիք հայտնեց Լեհաստանում ՀՀ նախկին դեսպան, «Համախմբում» նախաձեռնության անդամ Էդգար Ղազարյանը: Նա հեգնանքով նկատեց նաեւ, որ իր խորին համոզմամբ, Նիկոլ Փաշինյանը Չալաբյանին ձերբակալել եւ կալանավորել է Ադրբեջանի նախագահ Իլհամ Ալիեւի պահանջով կամ ցանկությամբ, քանի որ, վերջին շրջանի իր ուսումնասիրությունների առանցքում պահում էր Արցախի անվտանգության խնդիրները, Փառուխի իրադարձությունները, ՊԲ-ի լուծարման գործընթացը, որն ավարտին կհասցվի արդեն մեկնարկած այս զորակոչով:
Ավետիք Չալաբյանի գործը, ըստ Էդգար Ղազարյանի, բացարձակ դատարկ է նաեւ իր տրամաբանության տեսանկյունից. մինչ օրս ձերբակալված չէ գաղտնալսումն իրականացնող անձը, Հայաստանի իրավապահ մարմինները անգործունակ եւ անպիտան են գտնվել՝ բացահայտելու համար գաղտնալսող անձին: Ըստ բանախոսի, անօրինական տեղեկատվական նյութն ընդունվել է, որպես քրեական գործի հիմք, բայց գաղտնալսողը մինչ օրս բացահայտված չէ: Բացահայտված չէ նաեւ այն անձը, որը շահադիտական մոնտաժ է իրականացրել, ինչպես նաեւ պարզ չէ այն անձը, որը շահագրգիռ է եղել այդ նյութը ձայնագրելու, մոնտաժելու, հրապարակելու եւ տարածելու մեջ:
Ոստիկանության գործողություններն ամբողջության մեջ դիտարկելով, Էդգար Ղազարյանն ուշադրություն է հրավիրում այն հանգամանքին, որ հղի կնոջը սպանած ոստիկանության ծառայողն ազատության մեջ է: Ազատության մեջ է նաեւ Նիկոլ Փաշինյանի թիկնազորի պետ Սարգիս Հովհաննիսյանը, որը ուղիղ եթերում խուլիգանական վարքագիծ էր դրսեւորում՝ խոչընդոտելով լրագրողների աշխատանքը:
Նելլի ԳՐԻԳՈՐՅԱՆ
