Առողջապահության նախարար Անահիտ Ավանեսյանը մասնակցել է «ԱՊՐԻ 2022» համաժողովի շրջանակներում «հանրային առողջություն և բարեկեցություն» թեմայով ճեպազրույցին: Բանախոսել է նաև Կոլումբիայի համալսարանի հանրային առողջապահության մասնագետ Կիմ Հեքիմյանը:
Քննարկվել են`
- հանրային առողջության պահպանման առաջնահերթությունները` որպես կենսական ազգային, անվտանգային շահը,
- կանխարգելելի պատճառներից բնակչության մահացությանցուցանիշի նվազեցման հնարավորությունները,
- համընդհանուր առողջապահական ծածկույթի ձևավորումը,
- քաղաքացու համար բարձրորակ առողջապահական ծառայությունների ապահովումը:
Խոսելով հանրային առողջապահության վերջին մարտահրավերների` COVID-19-ի և պատերազմի մասին, նախարարը մատնանշել է Սփյուռքի հայրենակիցների հսկայական օգնությունը. «Սփյուռքը Հայաստանի առողջապահության ոլորտում անասելի մեծ ներդրում ունի, սակայն համագործակցությունը ոչ թե կարճաժամկետ հումանիտար օգնության, այլև ինստիտուցիոնալ կարողությունների զարգացմանը պետք է ուղղվի»,- ասել է Անահիտ Ավանեսյանը:
Անահիտ Ավանեսյանն անդրադարձել է Հայաստանի հանրային առողջապահության ոլորտի ներկա իրավիճակին, ոլորտի զարգացման նախապայմաններին: Նա ընդգծել է այնպիսի առողջապահական համակարգ ունենալու կարևորությունը, որի հիմքում առողջության պահպանումն է, որակյալ խնամքը, երկարատև համագործակցության ծրագրերը, արտակարգ իրավիճակների պլանավորման, մոնիտորինգի և գնահատման ամուր համակարգերը, ինչպես նաև` առողջապահական մշակույթն ու գրագիտությունը:
Կարդացեք նաև
Քննարկմանն առանձնացվել են Հայաստանի հանրային առողջապահական առաջնահերթությունները` առողջության համապարփակ ապահովագրության ներդրում, ԱԱՊ օղակի բարեփոխումների, առողջ ապրելակերպի խթանում, ծխախոտի վերահսկում, պատվաստումային գործընթաց:
«Տպավորիչ էր ծխախոտային արտադրատեսակների վերահսկման քայլը, որը, չնայած ճնշումներին, կբերի վաղաժամ մահացության, հոսպիտալացումների ցուցանիշի և դրա հետ կապված ծախսերի էական կրճատման»,- նշել է Կիմ Հեքիմյանը:
Անահիտ Ավանեսյանն ընդգծել է, որ հանրային առողջապահության ոլորտում անելիքերը շատ են, սակայն ցանկալի արդյունքի հասնելու ճանապարհը համբերությունն ու հաստատակամությունն է:
Առողջապահության նախարարություն
