Բարձրագույն դատական խորհուրդը (ԲԴԽ) քիչ առաջ ԲԴԽ նախագահ (լիազորությունները ժամանակավոր կասեցված) Ռուբեն Վարդազարյանի դեմ հարուցված կարգապահական պատասխանատվության ենթարկելու վերաբերյալ գործով գնաց խորհրդակցական սենյակ՝ որոշում կայացնելու Ռուբեն Վարդազարյանի պաշտպան Արամ Օրբելյանի ներկայացրած միջնորդությունների առիթով:
Նիստին ներկա չէին Ռուբեն Վարդազարյանն ու Արամ Օրբելյանը: Նիստի մեկնարկին ԲԴԽ նախագահի պաշտոնակատար Գագիկ Ջհանգիրյանը տեղեկացրեց՝ Արամ Օրբելյանը երկու միջնորդություն է ներկայացրել՝ կարգապահական վարույթը կարճելու և նիստը հետաձգելու մասին:
Գագիկ Ջհանգիրյանն այս առիթով ասաց. «Եթե խորհուրդը բավարարի առաջին միջնորդությունը, հետևաբար նիստի հետաձգման կարիք էլ չի լինի»:
Այնուհետև ԲԴԽ-ն հեռացավ խորհրդակցական սենյակ:
Կարդացեք նաև
Հիշեցնենք՝ ԲԴԽ երեք գիտնական անդամների՝ Գրիգոր Բեքմեզյանի, Լիպարիտ Մելիքջանյանի, Դավիթ Խաչատուրյանի
դիմումի հիման վրա կարգապահական վարույթ է հարուցվել Ռուբեն Վարդազարյանի դեմ` լրատվամիջոցներից մեկին տված մի հարցազրույցի հիման վրա, որտեղ իբրեւ թե Վարդազարյանն արտահայտել է տեսակետ ու տվել է գնահատականներ մի քրեական գործով, որով խախտել է դատավորի չեզոքության սկզբունքը:
Վերադառնալով խորհրդակցական սենյակից՝ Գագիկ Ջհանգիրյանը հայտարարեց. «Խորհուրդը որոշեց Ռուբեն Վարդազարյանին դեմ հարուցված կարգապահական վարույթը կարճելու մասին միջնորդությունը մերժել: Շարունակում ենք քննությունը»:
Նա խնդրեց ընթերցել նաև Արամ Օրբելյանի մյուս՝ հարցի քննությունը հետաձգելու միջնորդությունը: Այդտեղ Արամ Օրբելյանը հայտնում է, որ նույն օրը՝ հունիսի 16-ին, Սյունիքի մարզի առաջին ատյանի ընդհանուր իրավասության դատարանում քննվող երեք դատական գործերով նիստերի է մասնակցում, ուստի սույն գործով իր մասնակցությունն այս նիստին անհնար է: Եվ խնդրում է առնվազն մեկ շաբաթով հետաձգել նիստը: Խորհուրդը այս միջնորդությունը ևս մերժեց:
Տաթև ՀԱՐՈՒԹՅՈՒՆՅԱՆ
