Նիկոլ Փաշինյանի հրաժարականի պահանջով ապրիլի 17-ից Ազատության հրապարակում մեկնարկած ապակենտրոն պայքարին ապրիլի 18-22-ը հացադուլով միացած 44-օրյա պատերազմի մասնակից Նվեր Կիրակոսյանը չի ցանկանում այս փուլում գնահատականներ հնչեցնել Ֆրանսիայի հրապարակից վրանները հանելու եւ այլ մարտավարությամբ «Դիմադրության» շարժումը շարունակելու ընդդիմության քայլին:
Ամենակարեւոր հարցը, որի պատասխանն այսօր արդիական է, ըստ մեր զրուցակցի, «ինչպես»-ն է: Նա նկատի ունի, որ հանրային հետաքրքրությունների եւ քննարկումների թիվ մեկ հարցը այսօր պետք է լինեն անվտանգության ապահովման և Արցախի՝ հայկական պահպանման հարցերը:
««Ի՞նչը» հարցի պատասխանն այս ընթացքում անընդհատ ասվել է, բայց «ինչպե՞ս» հարցի պատասխանն այսօր պետք է հնչի: Իմ կարծիքով, Ավետիք Չալաբյանի՝ կալանավայրից հրապարակվող հոդվածաշարում է հնչում: Այսօր քիչ մարդիկ կան, որ տալիս են «ինչպե՞ս» հարցի պատասխանն ու այդ բացը կարելի է լրացնել Ավետիք Չալաբյանի հոդվածաշարից: Եվ խորհրդանշական է, որ այդ պատասխանները հենց կալանավայրից են հնչում», – Aravot.am-ի հետ զրույցում ասաց Նվեր Կիրակոսյանը:
Մեր զրուցակիցը ձեռնպահ է մնում շարժման հետեւանքով ձերբակալված եւ կալանավորված անձանց քաղբանտարկյալներ անվանելուց, քանի որ դա իրավաբանների գործն է, բայց, իբրեւ քաղաքացի, կարծում է, որ քաղաքական հետապնդման տարրեր կան շատերի գործերում:
Կարդացեք նաև
Նելլի ԳՐԻԳՈՐՅԱՆ
