«Ընդդիմադիրներն իրենց վճիռը կայացրել են եւ իրենց դուրս են դրել պատգամավորի կարգավիճակից»,- այսօր ԱԺ-ում լրագրողների հետ զրույցում ասաց ՔՊ խմբակցության պատգամավոր Վիգեն Խաչատրյանը:
Երբ լրագրողները զուգահեռ տարան այն ժամանակ ընդդիմադիր պատգամավոր Նիկոլ Փաշինյանի հետ, որը նույնպես չէր մասնակցում խորհրդարանական աշխատանքներին հեղափոխության օրերին՝ Վիգեն Խաչատրյանը հակադարձեց. «Նիկոլ Փաշինյանը հայտարարել էր, որ այլեւս չե՞մ գնալու խորհրդարան, այդպիսի բա՞ն էր հայտարարել»: Լրագրողները փոխանցեցին, որ Իշխան Սաղաթելյանն ասել է՝ գնալու ենք խորհրդարան մե՛ր օրակարգով, ընդ որում, արդեն ընտրություններից հետո մեկ տարվա ժամկետը լրանում է ու օգոստոսին կարող են կառավարությանը անվստահություն հայտնելու գործընթաց սկսել՝ Վիգեն Խաչատրյանն արձագանքեց. «Ձեզ թվում է Իշխան Սաղաթելյա՞նը պիտի որոշի Ազգային ժողովի օրակարգը: ԱԺ օրակարգը որոշվում է ԱԺ-ի քվեարկությամբ, որեւէ մեկը օրակարգ չի որոշում»:
Հռիփսիմե ՋԵԲԵՋՅԱՆ
