«Լաոները միշտ արթուն են, դա ցույց տվեց 44-օրյա պատերազմը: Փնտրտուք անել լաոներ գտնելու իմաստ չուներ, իրենք ճիշտ գնահատեցին իրավիճակը եւ ճանապարհը բացեցին»,- այսօր լրագրողների հետ զրույցում խոսելով «Դիմադրության» շարժման մասին՝ ասաց ԱԺ պաշտպանության եւ անվտանգության հարցերի հանձնաժողովի նախագահ Անդրանիկ Քոչարյանը:
Նրա խոսքով՝ երկրորդ նախագահ Ռոբերտ Քոչարյանը դարակազմիկ ժպիտով խուսափեց պատասխանել, թե ինչո՞ւ իրենց չհաջողվեց հեռացնել Նիկոլ Փաշինյանին. «Մենք պատրաստ ենք Ազգային ժողովում քննարկել մեզ հեռացնելու ծրագիրը, թող գան ներկայացնեն»:
Լրագրողները փոխանցեցին ընդդիմության բացատրությունը՝ իրենց պայքարն արդարացված է եղել, որովհետեւ իշխանությունը փաստաթուղթ էր պատրաստվում ստորագրել, վիժեցրել են՝ Անդրանիկ Քոչարյանն արձագանքեց. «Բա ուրիշ ի՞նչ պետք է ասեին, նահանջը ո՞նց պետք է ապահովեին»:
Կարդացեք նաև
Իսկ այն դիտարկմանը, որ ընդդիմությանը հաջողվել է Արցախի ժողովրդին համախմբել՝ Անդրանիկ Քոչարյանն ասաց. «Լո՞ւրջ եք ասում, ինչի մինչեւ այդ Արցախի ժողովուրդը համախմբված չէ՞ր, իրե՞նց էին սպասում: Թե՞ մի քանի հոգու որ բերել են Արցախից գործուղման «Դիմադրության» շարժմանը մասնակից դարձնելու ու որեւէ արդյունք չարձանագրելու… Բնականաբար, իրենք պետք է երեկվա իրենց որոշումը արձանագրեին հաղթանակով»:
Անդրանիկ Քոչարյանը ՀՅԴ-ին խորհուրդ է տալիս իրենց ավագ գործընկերների գործողությունները, որոնք իրականացրել են 90-ականներին, մի հատ վերլուծեն, հասկանան:
Հարցին՝ դուք ընդունո՞ւմ եք, որ հիմա իշխանության եք միայն այն բանի համար, որ ձեր հրաժարականը պահանջողները Սերժ Սարգսյանն ու Ռոբերտ Քոչարյանն են՝ Անդրանիկ Քոչարյանը պատասխանեց. «Քանի Սերժ Սարգսյանն ու Ռոբերտ Քոչարյանը կան, իրենք չեն կարող ընդդիմադիր դաշտը լցնեն: Երբ որ 2018-ին ձեւավորվում էր իշխանություն, պետք է ձեւավորվեր նաեւ ընդդիմություն՝ նույն տարիքային խմբի գուցե: Հիմա իրենք շատ են կարոտել իշխանությանը ու հիմա այդ կարոտախտը չեն կարողանում բավարարել, ի՞նչ անենք: Ավելի առողջ ընդդիմություն լինելու դեպքում մենք շատ էֆեկտիվ ընթացքի մեջ կլինեինք: Իսկ հրաժարականի խնդիրը լուծվում է Սահմանադրության պահանջներով»:
Հռիփսիմե ՋԵԲԵՋՅԱՆ
