«Ցավոք ես չեմ ծնվել Հայաստանում, բայց Հայաստանը միշտ ապրել է իմ մեջ»,-այսօր Ֆրանսիայի հրապարակում «Դիմադրության» կազմակերպած հանրահավաքի ժամանակ ասաց ՀՅԴ երիտասարդական թեւի անդամ Գառնի Պետրոսյանը: Գառնին ասաց, որ ապագա բժիշկ է եւ շարժման առաջին օրից պայքարում է եւ գտնում է, որ «այս ապազգային իշխանությունները, որոնք թրքամետ ուղղվածությամբ են», չեն կարող որոշել նրա եւ նրա ապագա երեխաների ճակատագիրը ու ապագան խաղաղ Հայաստանում:
«Պայքարում եմ, քանի որ միայն հարկեր վճարելով հնարավոր չէ փրկել հայրենիքը, պայքարում եմ, որովհետեւ հավատում եմ, որ առանց պետականության, առանց ազգային կառավարության չենք կարող ստեղծել մեր երազանքների Հայաստանը: Պետականության կառուցումը մեծ ջանքերի, շատ դեպքերում նաեւ արյան գնով է լինում, բայց այն կորցնելը շատ ավելի հեշտ է: Դրա համար պետք է գիտակցել, որ առաջնահերթը հայրենիքն է, գիտակցել, որ հիմա առաջնահերթություն է տղերքի կյանքի գնով պահած հողը»:
Գառնի Պետրոսյանն ասաց, որ ինքը երիտասարդ է եւ սիրում է մյուսների պես լավ տեղեր գնալ, զվարճանալ, բայց գիտակցում է, որ այս պահին առաջնահերթը Հայաստանն է. «Պետք է հասկանանք, որ կորցնում ենք հայրենիքը: Մեր անձնական շահերը, նպատակները, երազանքները պետք է լինեն երկրորդական: Պետք է հասկանանք, որ հիմա բոլորիս միակ նպատակը պետք է լինի հայրենիքի փրկությունը»:
Լուսինե ԲՈՒԴԱՂՅԱՆ
