Ս.թ. հունիսի 7-9-ը Լոնդոնում տեղի ունեցավ London Wine Fair գինիների միջազգային ցուցահանդեսը, որին Հայաստանը` որպես գինեգործական երկիր, առաջին անգամ մասնակցեց ազգային միասնական տաղավարով:
Հայկական 13 գինեգործական ընկերություններ ցուցահանդեսին մասնակցեցին Հայաստանի խաղողագործության և գինեգործության հիմնադրամի (ՀԽԳՀ) և USAID ֆինանսավորմամբ CARD հիմնադրամի կողմից իրականացվող RED-NEO ծրագրի համաֆինանսավորմամբ` ներկայացնելով ավելի քան 70 անուն հանգիստ և փրփրուն գինիներ:
«Հիմնադրամի կողմից իրականացված գինու շուկաների հետազոտությունը մեզ ցույց էր տվել, որ Անգլիան, որպես գնողունակ և որակյալ գինիների սպառման շուկա, մեծ ներուժ ունի հայկական բարձրակարգ գինիների արտահանման և իրացման համար: Ուստի ցուցահանդեսը հիանալի հնարավորություն էր Անգլիայի խստապահանջ սպառողներին և գինու վարպետներին ծանոթացնելու նախ Հայաստանի հետ, որպես հազարամյա գինեգործական ավանդույթների, ապա սրընթաց զարգացող գինու զբոսաշրջության երկիր:»-նշեց ՀԽԳՀ գործադիր տնօրեն Զարուհի Մուրադյանը:
Հայկական գինիների ճանաչելիությունն Անգլիայում բարձրացնելու նպատակով հունիսի 10-ին Մեծ Բրիտանիայում ՀՀ արտակարգ և լիազոր դեսպան Վարուժան Ներսիսյանի նախաձեռնությամբ և բարձր հովանու ներքո ՀԽԳՀ-ն կազմակերպեց հայկական գինու երեկո: Միջոցառմանը հրավիրված էին Անգլիայի բարձրաստիճան պաշտոնյաներ, գինու վարպետներ, մասնագետներ և գործարար և հայ համայնքի վառ ներկայացուցիչներ: Միջոցառումն իրականացավ USAID ֆինանսավորմամբ CARD հիմնադրամի կողմից իրականացվող RED-NEO ծրագրի աջակցությամբ:
Երեկոյին բացման խոսքով հանդես եկավ դեսպան Վարուժան Ներսիսյանն` ընդգծելով հայկական գինեգործության վերջին տարիներին գրանցած գովելի աճը և նման միջոցառումների իրականացման կարևորությունը: Հայաստանի գինու հազարամյա պատմությանը ծանոթացնելու նպատակով ՀԽԳՀ-ի միջազգային ծրագրերի փորձագետ Հայարփի Շահինյանը հյուրերի համար կազմակերպեց վիրտուալ շրջայց Հայաստանի գինեգործական մարզերով և գինու պատմամշակութային վայրերով:
ՀԽԳՀ-ը ստեղծվել է 2016 թ ՀՀ Կառավարության կողմից և նպատակ ունի խաղողագործության և գինեգործության ոլորտում ներդնել պետական քաղաքականության և զարգացման ծրագրերի նոր ռազմավարություն՝ միտված միջազգային շուկայում հայկական գինու մրցունակության բարձրացմանը, ոլորտի օրենսդրական դաշտի և որակի վերահսկման համակարգի կատարելագործմանը, գործարար միջավայրի բարելավմանը և արտահանման ծավալների մեծացմանը:
Հայաստանի խաղողագործության և գինեգործության հիմնադրամ
Վերջապես։ 12 տարի է վրացիները ամենակենտրոնում պավիլյոն ունեն իսկ հայկական չկար ու չկար։ Հիմա գոնե պարբերական դառնա մասնակցությունը