Սյունիքի մարզի ընդհանուր իրավասության դատարանի՝ Բարձրագույն դատական խորհրդի որոշմամբ լիազորությունները դադարեցրած դատավոր Բորիս Բախշիյանի (լուսանկարում) քրեական գործը մակագրվել է դատավոր Լուսինե Սեփխանյանին։ Վերջինս հենց այն դատավորն է, որը նշանակվել է Բախշիյանի փոխարեն։
Բորիս Բախշիյանին մեղադրանք է առաջադրվել ՀՀ քրեական օրենսգրքի 348 հոդվածի 2-րդ մասի հատկանիշներով (ակնհայտ ապօրինի ձերբակալելը)։ Ըստ «Դատալեքս» տեղեկատվական համակարգի` Բախշիյանն իր վարույթում քննված քրեական գործով իրականացնելով արդարադատություն եւ որպես դատավոր այլ լիազորություններ, ակնհայտ ապօրինի կալանավորել է նույն գործով ամբաստանյալ Նվեր Համբարձումյանին։
2021թ.-ի փետրվարի 7-ին Երեւան քաղաքի ընդհանուր իրավասության դատարանի դատավոր Դավիթ Արղամանյանն որոշում էր կայացրել կալանավորել Բորիս Բախշիյանին, որն ազատազրկված մնաց մոտ 3 ամիս։
Բախշիյանի նկատմամբ որպես խափանման միջոց այժմ կիրառվել է ստորագրություն չհեռանալու մասին։ Ազատվելուց հետո վերջինս հայտարարել է, որ իր նկատմամբ քրեական գործ հարուցելը ուղղակի միջամտություն էր դատավորի իր գործունեությանը։
Կարդացեք նաև
Գործը Լուսինե Սեփխանյանին մակագրվել է հունիսի 13-ին եւ դեռեւս դատական նիստի օր նշանակված չի։
Արմեն ԴԱՎԹՅԱՆ
