ՀՀ-ԵՄ Համապարփակ եւ ընդլայնված գործընկերության համաձայնագրի իրականացումը կարեւոր է Հայաստանի համար: Կարծում եմ, որ մենք շատ անելիքներ ունենք, պետք է հետեւենք, որ պահպանվեն համաձայնագրի իրականացման սկզբունքները: Այս մասին ասել է ՀՀ ԱԺ մարդու իրավունքների պաշտպանության եւ հանրային հարցերի մշտական հանձնաժողովի նախագահ Թագուհի Թովմասյանն «Աջակցություն ՀՀ արդարադատության նախարարությանը` ՀՀ-ԵՄ Համապարփակ եւ ընդլայնված գործընկերության համաձայնագրից բխող օրենսդրության մոտարկման գործընթացում» ծրագրի ղեկավար Միկելե Դինելիի հետ հանդիպման ժամանակ:
Հանձնաժողովի նախագահն անդրադարձել է զրպարտությունը քրեականացնող օրինագծին՝ նշելով, որ այն չի բխում համաձայնագրի սկզբունքներից:
Թագուհի Թովմասյանն ընդգծել է, որ իր տպավորությամբ հեղափոխությունից հետո իշխանությունը մերժել է ՀՀ-ԵՄ Համապարփակ եւ ընդլայնված գործընկերության համաձայնագիրը, ուստիեւ ողջունել է, որ ԵՄ-ն ակտիվորեն քննարկում է համաձայնագրի իրականացման հարցը:
Հանձնաժողովի նախագահը հավելել է, որ անհրաժեշտ է ոչ թե ՀՀ-ԵՄ Համապարփակ եւ ընդլայնված գործընկերության համաձայնագիրը համաձայնեցնել Հայաստանի իրավիճակին, այլ՝ Հայաստանում առկա իրավիճակը փորձել համաձայնեցնել ժողովրդավարության սկզբունքներին. պետք է ոչ թե փորձել հարմարվել հայաստանյան իրականությանը, այլ՝ Հայաստանը տանել ժողովրդավարացման ճանապարհով:
Կարդացեք նաև
Միկելե Դինելին շնորհակալություն է հայտնել ընդունելության համար: Նա նշել է, որ ՀՀ-ԵՄ Համապարփակ եւ ընդլայնված գործընկերության համաձայնագրի ծրագրի նպատակն է աջակցել ՀՀ կառավարությանը՝ իրականացնելու օրենքների մոտարկման գործողությունները: Ծրագրի ղեկավարի խոսքով՝ Հայաստանի կառավարությունը հանձն է առել իրականացնելու համաձայնագրով նախատեսված պահանջները: Մշակվելու են համապատասխան ուղեցույցներ, գործիքակազմ, որոնք կօգնեն գործընթացներն իրականացնելիս:
Հանդիպմանը մասնակցել են նաեւ ծրագրի փորձագետներ Մուշեղ Եկմալյանն ու Ամալյա Ոսկանյանը:
Մուշեղ Եկմալյանի ներկայացմամբ՝ մոտարկումը համաձայնագրի ողնաշարն է, համաձայն որի՝ ՀՀ-ԵՄ շուրջ 300 օրենսդրական ակտ, հրամանագիր եւ հրաման պետք է մոտարկվեն՝ ՀՀ համապատասխան օրենսդրությունը փոփոխելով: Նույն սկզբունքը եւ գործիքակազմը կիրառվել է նաեւ մյուս երկրներում: Նա ընդգծել է, որ քաղաքական ընդդիմությունը պետք է հետեւողական լինի համաձայնագրի ճանապարհային քարտեզի իրականացման հարցում: Փորձագետը տեղեկացրել է, որ առաջիկայում նախատեսվում է դասընթացներ անցկացնել Արդարադատության նախարարության, ինչպես նաեւ քաղաքացիական հասարակության ներկայացուցիչների համար: ՀՀ Ազգային ժողովում դասընթացներ կկազմակերպվեն Պետական-իրավական եւ Եվրոպական ինտեգրման հարցերի մշտական հանձնաժողովների փորձագետների համար:
Փորձագետ Ամալյա Ոսկանյանը ներկայացրել է մոտարկման իրավական գործընթացը, ծանոթացրել գործիքակազմին:
«Ազգային ժողովն առանցքային դեր ունի այս գործընթացում: Նոր օրենքները պետք է մշակվեն համաձայնագրի պահանջներին համապատասխան: Կարեւորում եմ աշխատանքը խորհրդարանի հետ»,- ասել է Միկելե Դինելին:
Ծրագրի փորձագետները պատրաստակամություն են հայտնել աջակցելու օրենքների նախագծերի մոտարկման ուսուցման հարցում:
ՀՀ Ազգային ժողով
