«2021 թվականի հունվարին, ՀԱՊԿ-ը ժամանակին արձագանքեց Ղազախստանի իրադարձություններին՝ զորք մտցնելով, սակայն, դեռ բաց է մնում հարցը կապված 2021 թվականի մայիսին Հայաստանի ինքնիշխան տարածք ադրբեջանական զորքերի ներխուժման հետ», – այսօր Երեւանում կայացած ՀԱՊԿ ԱԳ նախարարների խորհրդի նիստից հետո, լրագրողների հետ ճեպազրույցում հայտարարեց Հայաստանի արտգործնախարար Արարատ Միրզոյանը։
Նա տեղեկացրեց, որ նիստում նախ նեղ կազմով, ապա ընդլայնված կազմով քննարկվել են միջազգային եւ տարածաշրջանային անվտանգության ոլորտներում զարգացումների միտումները, անդրադարձել են ՀԱՊԿ ճգնաժամային արձագանքման մեխանիզմների կատարելագործմանը: Այս հարցը, ՀՀ ԱԳ նախարարի գնահատմամբ, Հայաստանի նախագահության առաջնահերթությունն է: Նա նաեւ ասաց, որ Հայաստանը հավատարիմ եղել է եւ մնում է ՀԱՊԿ շրջանակներում ակտիվ, նախաձեռնող փոխգործակցությանը, անդամ երկրների միջեւ համագործակցության ամրապնդմանը, կազմակերպության շրջանակներում արտաքին քաղաքականության համակարգման զարգացմանը, ՀԱՊԿ-ի դերի բարձրացմանը միջազգային ասպարեզում։
ՀԱՊԿ գլխավոր քարտուղար Ստանիսլավ Զասն էլ նկատեց, քննարկվող կարեւորագույն հարցերից էր ՀԱՊԿ ճգնաժամային արձագանքման հարցը: Ըստ նրա, Ղազախստանում խաղաղապահ գործողության ընթացքում ձեռք բերված փորձը լավ հիմք է հանդիսացել կառույցի ճգնաժամային արձագանքման համակարգի կատարելագործման հետագա քայլերի համար: «Ես տեղեկացրել եմ ՀԱՊԿ-ում արդեն սկսված աշխատանքի մասին, մենք մտադիր ենք մեկ ամսվա ընթացքում մշակել մի շարք փաստաթղթեր, մենք ճշգրտում ենք մեր օրենսդրական դաշտը, վերահսկման մարմինների եւ զորքերի պատրաստման համակարգը», – ասաց Ստանիսլավ Զասը։
Կարդացեք նաև
ԱԳ նախարարները մեծ ուշադրություն են դարձրել արտաքին անվտանգության հարցերին, որոնք գնալով բարդանում են եւ սպառնալիք են ներկայացնում: Ընդունված փաստաթղթում պետությունների հավասարության սկզբունքն է ամրագրվել՝ մեկ պետության անվտանգության հաշվին չեն կարող լուծվել մյուս պետության անվտանգության հարցերը:
Այլ մանրամասները՝ տեսանյութում
Նելլի ԳՐԻԳՈՐՅԱՆ
