«Այն քաոսացումը, կազմաքանդումը, որ տեղի ունեցավ մեր հայրենիքի ու պետականության հետ, մեկ օրում չեղավ։ Նրանք եկել էին զրոյացնելու և Հրանտ Մաթևոսյանի խոսքով՝ նրանց ուրացումը հայրասպանության վերածվեց՝ ջնջել, մերժել ամեն ինչ, ինչ կա»,- Ֆրանսիայի հրապարակում «Հայաստան» և «Պատիվ ունեմ» խմբակցությունների պատգամավորների մասնակցությամբ անցկացվող «Հայաստանը երեկ, այսօր և վաղը» թեմայով քննարկման ժամանակ հայտարարեց «Հայաստան» խմբակցության պատգամավոր Լիլիթ Գալստյանը։
Հիշեցնելով, որ 2018-ին որոշվեց միավորել մշակույթի և կրթության նախարարությունները, Լիլիթ Գալստյանը կարծիք հայտնեց՝ դրանք մեխանիկական միացումներ չէին ու նշեց․ «Չէր կարևորվում մշակույթի դերակատարությունը մեր պետականության ամրացման կառուցման, հայ մարդու ձևավորման գործում այն երկրում, որի համար մշակույթը եղել է հիմնական այցեքարտը։ Հետո հասկացանք, որ մշակույթն առհասարակ լուսանցքված է։ Այն մշակութային քաղաքականությունը, որ այսօր վարվում է ՀՀ-ում, չի ծառայում մեր ինքնության հարստացմանը, ձևավորմանը, ազգային պետականության կերտմանը»։
Անդրադառնալով կրթության ոլորտում գոյություն ունեցող խնդիրներին՝ Լիլիթ Գալստյանը մտահոգություն հայտնեց՝ բուհերը քաղաքականացված են ու հիշեցրեց․ «Ովքեր են բուհերի խորհուրդների նախագահները։ ԵՊՀ՝ Սուրեն Պապիկյան, Տնտեսագիտական համալսարան՝ Վահագն Խաչատուրյան, Պոլիտեխնիկ՝ Տիգրան Ավինյան։ Էս ե՞ն ձեր՝ բուհերը քաղաքականությունից զրկելու խոստումները , ապաքաղաքականացնելու խոստումները»։
Անդրադառնալով ԵՊՀ նախկին ռեկտոր Արամ Սիմոնյանի մահվանը, Լիլիթ Գալստյանն ասաց․ «Արամ Սիմոնյանին խոշտանգումների ու կտտանքների ենթարկեցին, և նա անժամանակ այսօր հեռացավ»։
Կարդացեք նաև
Պատգամավորը վստահեցրեց՝ իրենց պայքարը ոչ թե իշխանության, այլ վաղվա Հայաստանի համար է ու հայտարարեց․ «Այդ Հայաստանը պիտի լինի ուժեղ, անվտանգ, ՀՀ-ում զոռբայությունը տեղ չունի, ներազգային թշնամանքը տեղ չունի, մտավորականը հարգված պիտի լինի, երիտասարդը ոստիկանական բռնաճնշումների չպետք է ենթարկվի, ԱԳ նախարարը չի գնալու դռնեդուռ ու ծուռ վզով բանակցի, վարչապետը պետք է լինի ազգային արժեքների կրող»։
Տաթև ՀԱՐՈՒԹՅՈՒՆՅԱՆ
