Ժաննա Անդրեասյանը պատասխանում է Արմեն Աշոտյանին ու պատմում, որ իր աղջիկներից մեկի արդեն երրորդ պետական դպրոցն է փոխել՝ խնդիրների պատճառով:
ԿԳՄՍ փոխնախարար Ժաննա Անդրեասյանը ԱԺ-ում սուր ելույթ էր ունեցել ու անդրադարձել էր երեխաների անգրագիտությանը՝ ասելով. «2015-ին մաթեմատիկայի եւ բնագիտության միջազգային հետազոտության մեր երկրի արդյունքով տարրական դպրոցի ավարտին ամեն երրորդ երեխան չի կարողանում կարդալ եւ պարզ տեքստեր հասկանալ, չնայած գրաճանաչ է: Ֆունկցիոնալ անգրագիտություն է սրա անունը, երբ կարծես գիտես տառերն ու թվերը, բայց դա անօգուտ գիտելիք է, որովհետեւ անգիր գիտելիք է՝ կիրառության չտանող, մտածելու չտանող: Օրինակ, գիտես, գումարել, բաժանել, բայց ամենապարզ մաթեմատիկական խնդիրը նկարագրող տեքստը չես հասկանում, որպեսզի պատկերացնես՝ ինչը ինչին գումարել կամ գուցե հանել: 2003-2015-ին Հայաստանում աշակերտների 16-28%-ը չի կարողացել հաղթահարել մաթեմատիկայի միջազգային գնահատման ստորին շեմը, սա վկայում է ամբողջ թվերի, տասնորդական կոտորակների տարրական գիտելիքների բացակայության, թվաբանական գիտելիքների անկարողության մասին»:
Արձագանքելով Ժաննա Անդրեասյանի այս գնահատականներին, հատկապես, որ 2015-ի օրինակն էր բերել՝ ԿԳՄՍ նախկին նախարար Արմեն Աշոտյանը Aravot.am-ի «Կարմիր գիծ» հաղորդման ժամանակ ասել էր. «Այնպես չի, որ ես լավագույն նախարարն եմ եղել, բայց ստացվեց այնպես, որ ես 6 տարի նախարար չեմ ու լիքը մարդ ինձ երնեկ է տալիս ռեֆորմների, կառավարման իմաստով: Երբ Ժաննա Անդրեասյանը խոսում է անգրագիտության մասին, թող հիշի, որ ինքը Սերգո Երիցյանից մնացած աշխատող է եղել 2003-ից, իր հետ ես էլ եմ աշխատել: Ինքը ավելի նախկին է, քան անգամ ես կրթության ոլորտում: Տիկի՛ն հրաժարական տուր այդ պաշտոնից, որովհետեւ դուք 15-20 տարի կրթության ոլորտի ԾԻԳ-ում, որը համարվել է ուղեղային կենտրոն, փող բերող կենտրոն, բարձր պաշտոններ ես զբաղեցրել, առաջատար մասնագետ ես եղել, «փոլիսի մեյքինգի» վրա ազդել ես: Կան կարմիր գծեր, որ պետք է չհատել»:
Կարդացեք նաև
Կտա՞ հրաժարական Ժաննա Անդրեասանը, թե՞ չէ՝ երեկ «Առավոտի» հետ զրույցում նա այսպես պատասխանեց. «Չգիտեի, որ պարոն Աշոտանը արտահայտվել է այս թեմայով ու անձիս անդրադարձել, չեմ կարծում, որ անձին անդրադառնալը պրոֆեսիոնալ մոտեցում է: Ես միշտ գերադասում եմ չխոսել անձերից, խոսել խնդիրներից: Այդուհանդերձ, իր նշած հանգամանքների մեջ ոչ մի նորություն չկա: Եթե այդպես հետաքրքիր է իմ կենսագրությունը, պիտի խնդրեմ բացի նախարարության կայքը, բաց դրված է: Իմ աշխատանքային կենսագրությունը մի քիչ էլ վատ գիտի, որովհետեւ 2003-ից ես կրթութան ոլորտի աշխատանքերում ընդգրկված եմ եղել, բայց մինչեւ այդ էլ իմ ուսանողական գործունեության մեջ դասագրքերն եմ ուսումնասիրել, կուրսային աշխատանքներ ունեմ, իմ հետաքրքրությունը կրթության ոլորտում շատ ավելի վաղ է: Որեւէ բան ես չունեմ թաքցնելու: Կարեւոր ծրագրեր ենք իրականացրել, սկսել ենք դպրոցներում համակարգչային տեխնիկայի տրամադրումից, ռեսուրս կենտրոնի ստեղծումից, բուհերում լաբորատորիաների ստեղծմամբ ենք զբաղվել: Այդ ծրագրերի հիմնական մասը եղել է իմ ուղիղ համակարգման ներքո: Որեւէ կերպ չեմ կարծում, որ մարդը պիտի իր նախկին աշխատանքային կենսագրության եւ փորձառության որեւէ տողի համար վատ զգա, եթե վատ զգալու բան չունի: Չգիտեմ, թե ինչ է մատնանշում պարոն Աշոտյանը, երբ պահանջում է, որ իմ գործունեության համար հրաժարական տամ: Իմ գործունեությունն է ինձ հնարավորություն տալիս, որ ես այսօր զբաղվեմ կրթության ոլորտով ու առաջ տանեմ այն բարեփոխումները, որի կարիքը կա: Իսկ պարոն Աշոտյանը, լինելով համակարգի ղեկավարը տարիներ շարունակ, պիտի շատ լավ հասկանա, որ ծրագրերի շրջանակներում գործողությունները ու դրանց վրա ազդեցությունը նույնը չի, ինչ ոլորտի քաղաքականության մշակումը: Մենք ծրագրեր ենք իրականացրել ու դրա շրջանակներում փորձել ենք անել լավագույն հնարավորը մեր կրթական համակարգի համար այն պայմաններում, ինչի գործիքակազմն ունենք: Այսօր ես կարող եմ ազդել ոլորտի քաղաքականության մշակման վրա, որը նախկինում եմ ունեցել»:
Հարցին՝ այսինքն, շուրջ 20 տարի աշխատելով ԿԳՆ-ում, դուք, ճի՞շտ եմ հասկանում, որ ձեր մեղքի բաժինը նաեւ չեք տեսնում նրա մեջ, որ երեխաներն անգրագետ են, կարդացածը չեն հասկանում ու ֆունկցիոնալ չեն իրենց ստացած գիտելիքները՝ Ժաննա Անդրեասյանը պատասխանեց. «Հարցին պատասխանելու համար ձեզ պիտի խնդրեմ ավելի կոնկրետ նայել, թե ես ինչով եմ զբաղվել: Ինչպե՞ս կարելի է լոկալ ծրագիրը եւ դրա իրականացման որակը համեմատել օրինակ հանրակրթության պետական չափորոշիչի փոփոխության հետ, որով դու հնարավորություն ես ստանում բոլոր դպրոցներում վարվող քաղաքականության վրա ազդել: Չեմ կարծում, որ համեմատելի է լոկալ ծրագրերի եւ դրանց ազդեցությունը կրթական համակարգի վրա՝ քաղաքականության տեսանկյունից: Նույնիսկ զարմանում եմ, որ այդ պաշտոնում աշխատած մարդու մտքով կարող է նման բան անցնել»:
Հարցին՝ կարո՞ղ եք երաշխավորել, որ տարիներ անց հաղթահարվելու է այն անգրագիտությունը, որի մասին դուք խոսում էիք որովհետեւ այսօր էլ դպրոցներում երեխաների անհատականությունը ճնշվում է, քառակուսի մտածելակերպով են սարքում երեխաներին՝ Ժաննա Անդրասյանը պատասխանեց. «Ես էլ ունեմ դպրոցահասակ երեխաներ ու իմ երեխաները գնում են ամենասովորական պետական դպրոց: Ես երբեք իմ երեխաներին, մտքովս էլ չի անցել հանել ու տանել ոչ պետական դպրոց, եւ ես անցնում եմ պետական դպրոցների բոլոր դժվարությունների միջով: Աղջիկներիցս մեկի երրորդ դպրոցն եմ փոխել, որովհետեւ այս դիրքում շատ ավելի դժվար կլիներ որեւէ բան անել, որովհետեւ որեւէ բան անելը որպես ծնող կդիտարկվեր, որ ես լծակ եմ օգտագործում: Հետեւաբար ես, որպես ծնող, շատ լավ եմ պատկերացնում, թե դուք ինչի մասին եք խոսում եւ, այո, ես նաեւ որպես ծնող անելու եմ ամենը, որ մեր երեխաները ունենան լավագույն հնարավորությունները՝ կրթություն ստանալու»:
Հռիփսիմե ՋԵԲԵՋՅԱՆ
«Առավոտ» օրաթերթ
08.06.2022
