«Ամերիկայի ձայն». Դերասան, ԱՄՆ-ի Թեքսաս նահանգի Ուվալդե քաղաքից սերած Մեթյու ՄաքՔոնահեյը երեքշաբթի օրը հանդիպում է ունեցել նախագահ Ջո Բայդենի հետ և հուզական ելույթում կոչ արել Կոնգրեսին ավելի վճռական քայլեր ձեռնարկել հրազենային բռնության դեմ: Նա իր ելույթը կենտրոնացրել է այս քաղաքի տարրական դպրոցում անցյալ ամիս իրականացված զանգվածային սպանության վրա, որի արդյունքում սպանվել էր 19 երեխա և երկու ուսուցիչ:
ՄաքՔոնահեյն, ով անցյալ տարի մտադիր էր պայքարել այս նահանգի նահանգապետի պաշտոնի համար, սակայն ավելի ուշ որոշել էր հետ կանգնել այդ մտքից, կարճ զրույց է Սպիտակ տանն ունեցել Ջո Բայդենի հետ, որից հետո մասնակցել է մամլո ասուլիսին:
52-ամյա դերասանն ասել է. «Ուվալդեն այն վայրն է, որտեղ ինձ սովորեցրել են հարգել այն սարքը, որն անվանում ենք հրացան: Ուվալդեն այն վայրն է, որտեղ ես սովորեցի պատասխանատվություն ստանձնել զենքին տիրապետելու հարցում», ասել է նա:
Նրա խոսքերով, նման պատասխանատվության զգացում ունեցող մարդիկ արդեն շատ են հոգնել Սահմանադրության երկրորդ փոփոխությունը շահարկելու փորձերից, ինչի արդյունքում այդ զենքը դառնում է չարիք խելագար անձանց ձեռքերում: Հիշեցնենք, որ Զենք կրելու իրավունքների պաշտպաններն ասում են, թե Սահմանադրության երկրորդ փոփոխությունը թույլ է տալիս ունենալ ու կրել զենք:
ՄաքՔոնահեյը կոչ է անում AR-15 կիսաաինքնաձիգ հրացան գնելու նվազագույն տարիքը հասցնել 21-ի: Հիշեցնենք, որ այս քաղաքի դպրոցում սպանդն իրականացրել էր 19-ամյա մի տղա:
ՄաքՔոնահեյն իր ելույթի ժամանակ մի քանի անգամ խեղդվեց արցունքը կուլ տալով, երբ ցուցադրում էր 19 երեխաների նկարները: Նա խոսում էր զոհ դարձած երեխաների ընտանիքների մասին, պատմում էր, թե ինչ են վերջին օրը վերջին անգամ հագել այս երեխաները, ինչ երազանքներ են նրանք ունեցել:
Մակքոնահեյը ելույթ էր ունենում այն ժամանակ, երբ ԱՄՆ-ի Սենատում դեմոկրատները հայտարարեցին, որ իրենց ոգևորել են հրազենի մասին օրենսդրության շուրջ հանրապետական գործընկերների հետ անցկացված բանակցությունները: Սակայն, ասում են նրանք, իրենք չեն կարծում, որ փոխզիջումային մի տարբերակի շուրջ համաձայնությունը կարող է ապահովել զենքից լիովին հրաժարում:
Դերասանն ավելի վաղ հանդիպել էր Կոնգրեսի օրենսդիրների հետ՝ քննարկելու զենքի բարեփոխման մասին օրենսդրությունը: Քաղաքական գործիչներին նա խնդրել էր փոխել այս կարեւոր խնդրի նկատմամբ իրենց վերաբերմունքը, եւ գտնել ուղի, որը կբացառեր զանգվածային սպանություններն այս երկրում:
Հոդվածը կազմված է «Ռոյթերս»-ից ստացված լուրերի հիման վրա:
