«Վերջին շրջանում քաղաքական պրոցեսները հատկապես սահմանազատման ու սահմանագծման առումով տարաբնույթ եւ հակասական են: Մի կողմից տեսնում ենք, որ Արեւմուտքն ակտիվորեն ջանում է, որպեսզի վերջնականապես սպասարկվի Իլհամ Ալիեւի շահը, գործնական փուլ տեղափոխվեն սահմանազատումն ու սահմանագծումը, մյուս կողմից ռուսական կողմը չի շտապում, սահմանագծման եւ սահմանազատման առումով որոշակի վերապահումներ կան»,-«Հայելի» ակումբում նշեց Ադրբեջանի հարցերով փորձագետ Գառնիկ Դավթյանը:
Նրա խոսքով. «Այս համատեքստում նախ եւ առաջ ընդգծվում են Արեւմուտք-Արեւելք հակասությունները` առնվազն քաղաքական մակարդակում: Իմ տպավորությամբ, Արեւմուտքն ամեն ինչ անում է, որպեսզի Հարավային Կովկասում ժամանակավոր զինադադարը, նոյեմբերի 9-ին ստորագրված փաստաթուղթը որոշակիորեն հարցականի տակ հայտնվի: Չնայած նոյեմբերի 9-ի փաստաթուղթը մեզ համար կործանարար էր, բայց ամեն դեպքում միակ փաստաթուղթն է, որ այսօր տարածաշրջանում խաղաղություն է ապահովում»:
Ադրբեջանագետի ձեւակերպմամբ, թեեւ կա Արեւելք-Արեւմուտք հակասությունը, բայց նաեւ չպետք է մոռանալ ադրբեջանական շահի մասին. «Իհարկե, Ադրբեջանը չունի այնքան ռեսուրսներ, որ եվրոպական երկրներին պահանջվող չափով գազ մատակարարի, բայց կարող է լինել տարանցիկ պետություն եւ այլ երկրներից էներգետիկ ռեսուրսներ ներկրվեն: Ընդհանուր համատեքստում պարզ է, որ Արեւմուտքը փորձում է Ադրբեջանի շահը բանեցնել Հայաստանի վրա` մի կողմ դնելով մարդու իրավունքները եւ Արցախի ժողովրդի ինքնորոշման իրավունքի սկզբունքը»:
Գառնիկ Դավթյանը հենց այս համատեքստում է տեսնում արագացված կարգով սահմանագծման, սահմանազատման հանձնաժողովի ստեղծման առիթով արեւմտյան կողմի ոգեւորությունը, ընդգծում է, որ Խաղաղության պայմանագրի մասով էլ որոշակի կոնկրետացումներ կան Շարլ Միշելի հայտարարության տեքստում:
Կարդացեք նաև
Ադրբեջանի հարցերով փորձագետն ասում է, որ Ադրբեջանն ամեն ինչ անում է միջազգային հանրության մոտ կառուցողական երեւալու համար, ներկայացնում է, որ ձգտում է խաղաղության, նաեւ շեշտադրում, որ իբր հայկական կողմը չի կատարում իր ստանձնած պարտավորությունները: Նրա խոսքով, հայկական կողմն էլ չունի դիվանագիտական պարզ տրամաբանություն, որպեսզի ձգի գործընթացները մինչեւ կարողանա էլ ավելի շահեկան դիրքերից հանդես գալ:
Գոհար ՀԱԿՈԲՅԱՆ
