Aravot.am-ի տեղեկություններով, մայիսի 26-ին և հունիսի 1-ին հաղորդվել էր «Նուբարաշեն» պոլիկլինիկա առողջապահական պետական ՓԲԸ տնօրեն Գ․ Մ․–ի կողմից մանկաբույժ Ռ.Գ-ի, լաբորանտ Ա. Լ.-ի եւ Ա. Բ.-ի կողմից աշխատանքի չհաճախելու պայմաններում կեղծ փաստաթղթեր օգտագործելու եղանակով վերջիններիս աշխատավարձերի գումարները յուրացնելու, ինչպես նաև Ս. Ս.-ից 2014-2022թթ ընթացքում որպես կաշառք շուրջ 6 մլն դրամ գումար ստանալու մասին:
ՀՀ ոստիկանության ֆինանսավարկային և մտավոր սեփականության ոլորտում կատարվող հանցագործությունների դեմ պայքարի բաժնի ծառայողների կողմից ձեռնարկված միջոցառումների արդյունքում պարզվել է, որ պոլիկլինիկայի տնօրենը պաշտոնեական դիրքն օգտագործելով՝ «Նուբարաշեն» պոլիկլինիկա առողջապահական պետական ՓԲԸ բժիշկ-թերապևտ Ռ. Ա.-ից 2013թթ պահանջել է նրա աշխատավարձի, իսկ արդեն 2020թթ էլ COVID 19 համավարակի դեմ պատվաստումների քանակից ստացված լրավճարների 30 տոկոսի չափով գումարները, որից հետո Ռ.Ա.-ն ավելորդ խնդիրներից խուսափելու և աշխատանքը չկորցնելու մտավախությունից ելնելով 2013-2022թթ. ընթացքում յուրաքանչյուր ամիս աշխատավարձի, ինչպես նաև հավելավճարների գումարներից կանխիկացրել և տնօրենին որպես կաշառք առձեռն տվել է 5.800.000 ՀՀ դրամ գումար:
Փաստերի առթիվ հարուցվել է քրեական գործ, որն ուղարկվել է ՀՀ հակակոռուպցիոն կոմիտե:
