Եվրամիության աջակցությամբ Կապանում հնարավորություն կա ավելացնելու ոչ ֆորմալ կրթության բաղադրիչը, բանակցությունները դրական փուլում են։ Այս մասին այսօր ԱԺ մշտական հանձնաժողովներում ՀՀ 2021թ․ պետական բյուջեի կատարման տարեկան հաշվետվության քննարկման ժամանակ հայտարարեց ԿԳՄՍ նախարարի տեղակալ Ժաննա Անդրեասյանը։ Նա հայտնեց, որ քննարկվում է Կապան խոշորացված համայնքում «Հայաստանի մանուկներ» հիմնադրամի կողմից սմարթ կենտրոնի կառուցման հնարավորությունը։
«Լոռու մարզի Դեբեդ համայնքում գործում է նման կենտրոն, որը ոչ ֆորմալ կրթության շատ լավ օրինակ է։ Մոտ 2000 երեխաներ 27 համայնքից տարբեր դասընթացների են մասնակցում։ Ընդգրկված են նաեւ նախադպրոցական տարիքի երեխաներ։ Նման կենտրոն մենք կունենանք նաեւ Կապանում։ Ֆորմալ կրթության ծրագիրը, միանալով ոչ ֆորմալ կրթության միջավայրին, մի ամբողջ էկոհամակարգ է ստեղծելու եւ թույլ է տալու ունենալ շատ որակյալ կրթություն»,-նշեց Ժաննա Անդրեասյանը։
Նա նշեց նաեւ, որ ԵՄ-ի հետ քննարկվում է կրթական չափորոշիչների շարունակական ներդրման հարցը․ «Բնագիտական, տեխնոլոգիական, մաթեմատիկական ուղղությունների խորացումը մեր համար կարեւոր է։ Տավուշում արդեն իսկ ունենք լաբորատոր ենթակառուցվածքներ։ Կարող ենք ԵՄ-ի հետ քննարկել եւս երեք մարզերում նման ենթակառուցվածքներ ձեւավորելու, ուսուցիչների կարողությունները զարգացնելու հնարավորությունը»։
Լուիզա ՍՈՒՔԻԱՍՅԱՆ
