«Դիմադրության» շարժման անդամները այցելում էին նախարարությունների շենքեր, որ հանդիպեն նախարարներին՝ մեկ հարցի պատասխան ստանալու համար՝ պատրա՞ստ են ասել, որ Արցախը երբեք չի լինելու Ադրբեջանի կազմում:
Այսօր ԱԺ-ում լրագրողները առողջապահության նախարար Անահիտ Ավանեսյանին հարցրեցին՝ կաշկանդվածությո՞ւն ունեք, որ չեք հանդիպում ընդդիմության ներկայացուցիչների հետ: Նա պատասխանեց, որ ուրախ կլիներ, եթե պատգամավորները գային ԱԺ ու մասնակցեին կառավարության հետ հարցուպատասխանին, իրեն էլ սուր հարցեր տային. «Բայց, ցավոք, վերջերս ականատես ենք, որ միշտ դատարկ է դահլիճը եւ ինձ հասկանալի չէ, թե հնարավորությունը լինելով ինձ հարցեր ուղղելու, ինչի՞ են նպատակաուղղված հանդիպում ուզում ունենալ»:
Անահիտ Ավանեսյանը դժգոհեց նաեւ, որ ընդդիմադիրները չեն օգտագործում խորհրդարանական հարթակը, որի համար լիազորված, ընտրված են. «Չեն գալիս, հարցեր չեն տալիս, մեզ ուղղված քննադատություն չեն իրականացնում: Իմ կարծիքով, ճիշտ չէ դա»: Լրագրողները փոխանցեցին՝ ընդդիմության պահանջը՝ ասել, որ Արցախը չի լինելու Ադրբեջանի կազմում, Ավանեսյանը արձագանքեց. «Ես նրանց պահանջին ծանոթ չեմ, մինչեւ հիմա չեմ հասկացել ինչում է պահանջը: Մինչեւ հիմա որեւէ հոդաբաշխ բան չեմ լսել, երբ որ լսեմ, կպատասխանեմ»:
Կարդացեք նաև
Ինչ վերաբերում է կաշկանդվածությանը Արցախի վերաբերյալ դիրքորոշում արտահայտելու՝ Անահիտ Ավանեսյանն ասաց. «Ես պետական ծառայող եմ եւ ընդհանուր առմամբ իմ գործունեության մեջ կաշկանդված եմ օրենքով գործելու»:
Հռիփսիմե ՋԵԲԵՋՅԱՆ
