Ադրբեջանի արտգործնախարար Ջեյհուն Բայրամովը համոզմունք է հայտնել Բաքվի և Անկարայի միջև հարաբերությունների հետագա խորացման վերաբերյալ:
«Ադրբեջանն ու Թուրքիան այս տարի նշում են դիվանագիտական հարաբերությունների ձևավորման 30-ամյակը: Ադրբեջանը շատ բարձր է գնահատում Թուրքիայի քաղաքական աջակցությունը, որն Անկարան ցուցաբերում է Բաքվին: Շուշիի հռչակագրի ստորագրումից հետո մեր երկրների միջև հարաբերությունները հասել են ռազմավարական գործընկերության… Ես վստահ եմ, որ ի շահ մեր ժողովուրդների, այս գործընկերային հարաբերություններն էլ ավելի կզարգանան»,- ասել է Բայրամովն Անկարայում տեղի ունեցած ճեպազրույցում:
Նրա խոսքով՝ Բաքվի և Անկարային ռազմավարական գործընկերությունն ունի «հսկայական տնտեսական ներուժ», որը «ծառայում է տարածաշրջանի խաղաղության, կայունությանը և տնտեսական զարգացմանը»:
«Մեր երկրների մասնակցությամբ իրականացվում են համաշխարհային տնտեսական նախագծեր, որոնք նպաստում են ոչ միայն երկկողմ շրջանառության ավելացմանը, այլ Ադրբեջանը և Թուրքիան վերածում են տարածաշրջանում խոշոր էներգետիկ, տրանսպորտային և լոգիստիկ հանգույցի»,- ասել է նա:
Կարդացեք նաև
Բայրամովը հավելել է, որ Թուրքիան ու Ադրբեջանը բարեհաջող աշխատում են բազմակողմ ձևաչափերում:
Պատրաստեց Վիկտորյա ԱՆԴՐԵԱՍՅԱՆԸ
