Այսօր արտաքին գործերի նախարար Արարատ Միրզոյանը ԱԺ հանձնաժողովների համատեղ նիստում ներկայացրեց 2021-ի բյուջեի կատարողականը:
Նա բացատրեց, թե ինչու է ԵԱՀԿ Մինսկի խմբի համանախագահության ձեւաչափով դեկտեմբերին Ստոկհոլմում նախատեսված հնգակողմ հանդիպումը չեղարկվել: Այն նախատեսված էր ԵԱՀԿ նախարարական վեհաժողովի շրջանակներում. «Ադրբեջանական կողմը հանդիպումից մի քանի ժամ առաջ չեղարկեց այդ հանդիպումը: Ի դեպ, նախքան հնգակողմ՝ 3+2 ձեւաչափով հանդիպումը համանախագահները առանձին հանդիպումների ընթացքում կողմերին էին ներկայացրել հստակ բանակցային օրակարգ: Հատկանշական է նաեւ, որ դրանից օրեր առաջ Վիեննայում տեղի ունեցած ԵԱՀԿ մշտական խորհրդի նիստում՝ իրենց մեկ տարվա գործունեությունը ներկայացնելիս, համանախագահները կրկին հստակորեն արձանագրել էին իրենց մանդատը ու ահա այս երկու գործոններն էլ՝ համանախագահության ձեւաչափի եւ մանդատի շուրջ ունեցած Ադրբեջանի ընդհանուր վերաբերմունքին զուգահեռ մեր կարծիքով դարձան ստոկհոլմյան հանդիպման չեղարկման հիմնական պատճառները»:
Արարատ Միրզոյանը նաեւ նշեց, որ 2021-ի դեկտեմբերին մի քանի անգամ հետաձգվելուց հետո առցանց եղանակով կազմակերպվել է ԼՂ հակամարտության հարցով համաժողով, այն կրել է «ԵԱՀԿ Մինսկի կոնֆերանսի կողմից հասցեագրվող հակամարտությունը անցած տարվա ռազմական գործողությունների հետեւանքներից դեպի քաղաքական կարգավորում» անվանումը:
Հռիփսիմե ՋԵԲԵՋՅԱՆ
