«Շանթ Դաշինք» ազգայնական կուսակցությունը հերթական անգամ վերահաստատում է Արցախի հարցի վերաբերյալ առաջ քաշած ներքոգրյալ սկզբունքների պահպանման անհրաժեշտությունն ու կարևորությունը:
1. Արցախի հարցի շուրջ ընթացող հայ-ադրբեջանական բանակցություններն ու գործընթացները պետք է վերադառնան Մինսկի խմբի շրջանակներում առաջ քաշված սկզբունքների և մոտեցումների տիրույթ, որտեղ ամրագրված հիմնարար երեք սկզբունքներից է ազգերի ինքնորոշման իրավունքը:
2. Հայաստանը՝ հիմնվելով միջազգային իրավունքի դրույթներին, հետամուտ պետք է լինի ազգերի ինքնորոշման իրավունքի հիման վրա պաշտպանելու արցախահայության շահերն ու անվտանգությունը:
«Շանթ Դաշինքը» վստահ է, որ յուրաքանչյուր ժողովրդի ազգային շահերի ու անվտանգության ապահովման լավագույն միջոցը՝ տվյալ ժողովրդի կողմից՝ սեփական կամքով, ինքնիշխան կառավարություն ձևավորելն է:
Կարդացեք նաև
«Շանթ Դաշինքը» համոզված է, որ Հայաստանը Մինսկի խմբի շրջանակներում ազգերի ինքնորոշման իրավունքը վճռականորեն պաշտպանելու համար, նախ և առաջ, պարտավոր է ձևավորել ներքին և արտաքին անհրաժեշտ ռեսուրսներ: Առաջնային ենք համարում զինված ուժերի անհապաղ բարեփոխումները, դիվանագիտական կորպուսի հզորացումը, ինչպես նաև արտաքին քաղաքական իրավիճակի համապատասխան ադեկվատ վերլուծությունների հիմքի վրա՝ արտաքին աշխարհաքաղաքական դաշնակիցների փնտրտուքը՝ խարսխված փոխադարձ շահերի վրա:
«Շանթ Դաշինք» ազգայնական կուսակցությունը գիտակցում է, որ վերոնշյալ խնդիրների լուծումներն անիրատեսական է Հայաստանի այսօրվա կապիտուլյանտ իշխանությունների կողմից: Ուստի, մենք առաջնային կերպով կարևորում ենք կապիտուլյանտ իշխանության օր առաջ հեռացումը և համաժողովրդական վստահություն վայելող իշխանության ձևավորումը:
«Շանթ Դաշինքը» պնդում է, որ վստահելի կառավարություն կարող է համարվել այն իշխանությունը, որը մինչև բանակցային գործընթացի ակտիվացումը, Հայաստանի խորհրդարանում օրինագիծ կներկայացնի՝ դատապարտելու և չեղարկելու 1921 թվականին Կարսում Հայաստանին պարտադրված անեքսիոնիստական ապօրինի պայմանագիրը:
Շանթ Դաշինք ազգայնական կուսակցություն
