Լեգենդար Սիսական ջոկատի հրամանատար Աշոտ Երկաթ Մինասյանը երեկ Ֆրանսիայի հրապարակում հանրահավաքի ժամանակ կոչով դիմեց նաեւ մարզիկներին ու մարզաշխարհի ներկայացուցիչներին:
«Ուզում եմ իմ կոչը ընդունելի լինի այն բոլոր մարդկանց համար, որոնք հարյուրամյակ շարունակ ծափահարել են իրենց հերոսներին, որոնք ընդունել են իրենց հերոսներին: Ես կոչ եմ անում այն մարդկանց, որոնք մեր հերոսապատումը կերտել են:
Առաջինը իմ ժողովրդի ծոցից դուրս եկած այն բոլոր սպորտսմեններն են, որոնք աշխարհի տարբեր հարթակներում, եվրոպաներում եւ օլիմպիական խաղերում կերտել են հաղթանակ եւ իրենց ուսերին տարել մեր պետության դրոշը, հաղթողի դրոշը: Ես ուզում եմ, որ վաղը եւեթ, այսօր եւեթ նրանք լինեն այս հարթակում՝ իրենց դրոշներով հանդերձ: Վաղը, եթե իրենք չեկան, ապա ո՞ւմ դրոշն են բարձրացնելու իրենց ուսերին. Ադրբեջանի՞, Թուրքիայի՞, թե՞ թուրանի»,-ասաց լեգենդար հրամանատարը:
Աշոտ ՀԱԿՈԲՅԱՆ
