Լեռնային Ղարաբաղում ռուս խաղաղապահների թիվը պետք է ավելացնել, իսկ նրանց լիազորությունները՝ ընդլայնել: Այս մասին հայտարարել է Արցախի պետնախարար Արտակ Բեգլարյանը «ՌԻԱ Նովոստիին» տված հարցազրույցում:
«Մենք կարծում ենք, որ ռուսական զորամիավորման թիվն անհրաժեշտ է ավելացնել, ինչպես նաև ընդլայնել դրա լիազորությունները»,- ասել է Բեգլարյանը: Որպես դրա հիմնավորում Բեգլարյանը բերել է այն փաստը, որ պատերազմից հետո շփման գիծը Ղարաբաղում ավելացել է մոտ 2.5 անգամ:
Նա նաև նշել է, որ ռուս խաղաղապահները պետք է Լեռնային Ղարաբաղում մնան անժամկետ, իսկ այս պահին նրանց ներկայությունը, հատկապես, անհրաժեշտ է:
«Մենք կարծում ենք, որ խաղաղապահ զորամիավորումն այստեղ պետք է մնա անժամկետ, քանի որ հակամարտությունը կարգավորված չէ», – ասել է նա:
Կարդացեք նաև
Բեգլարյանի խոսքով՝ Ադրբեջանը պատրաստ չէ Արցախի հետ բանակցությունների այն հստակ սկզբունքների վրա, որոնք առաջարկել են միջազգային միջնորդները՝ տարածքային ամբողջականություն, ազգերի ինքնորոշման իրավունք և ուժի ու ուժի սպառնալիքի չկիրառում:
«Երբ որ հակամարտությունը կարգավորվի, Լեռնային Ղարաբաղի և Ռուսաստանի միջև կարող է քննարկվել խաղաղապահների հետագա մնալու հարցը, նրանք կարող են անհրաժեշտությունից ելնելով և կախված իրավիճակից՝ մնալ այստեղ՝ որպես անվտանգության երաշխավոր: Բայց այս պահին կա Ղարաբաղում ռուս խաղաղապահների գտնվելու սուր անհրաժեշտություն», – ասել է Բեգլարյանը:
Պատրաստեց Վիկտորյա ԱՆԴՐԵԱՍՅԱՆԸ
