Սահմանադրական դատարան ներկայացվող դիմումների քանակը եւ ծանրաբեռնվածությունը տարեցտարի աճում են․ 2021թ․ տվյալներով՝ երեք անգամ ավելացել է դիմումների թիվը, եւ նույն գործընթացը տեղի է ունենում նաեւ 2022թ․-ի ընթացքում՝ նույն ինտենսիվությամբ։ Այս մասին այսօր ԱԺ մշտական հանձնաժողովներում ՀՀ 2021թ․ պետական բյուջեի կատարման տարեկան հաշվետվության քննարկման ժամանակ հայտարարեց սահմանադրական դատարանի աշխատակազմի ղեկավար Սամվել Առաքելյանը։
ԱԺ պետաիրավական հարցերի հանձնաժողովի նախագահ, ՔՊ խմբակցության պատգամավոր Վլադիմիր Վարդանյանը հետաքրքրվեց՝ նա նորմա՞լ գործընթաց է, կապված է ՍԴ գործառույթների աճի՞ հետ, թե՞ գործ ունենք դիմումների արհեստական գրաֆիկ ձեւավորելու հետ․ «Եթե առաջինն է եւ նորմալ է, պետք է մտածենք, թե ինչպես ավելացնենք ՍԴ ֆինանսավորումը։ Եթե արհեստական է, հասկանանք՝ գուցե այն հնարավո՞ր է կասեցնել օրենսդրական համապատասխան փոփոխություններով»։
Սամվել Առաքելյանը դժվարացավ ասել՝ գործընթացն օրինաչա՞փ է, թե՞ արհեստական․ «Փաստ է, որ այդ դիմումները կան եւ դրանցով պետք է զբաղվել։ ՍԴ-ն պետք է վերաբերմունք ցույց տա այդ դիմումներին։ Անկախ նրանից՝ նրանք օրինաչա՞փ են, թե արհեստական, ծանրաբեռնվածությունը կա։ Ֆինանսավորման ավելացման տեսանկյունից նշանակություն չունի (ժպտում է․-հեղ․)»։
Լուիզա ՍՈՒՔԻԱՍՅԱՆ
