«Հայաստանի Հանրապետության ջրային պաշարների, ակունքների 40 տոկոսը մնացել է թշնամու վերահսկողության ներքո: Մասնավորապես խոսքը վերաբերում է Սյունիքի, Քարվաճառի հատվածում գտնվող ակունքներին, որտեղից սկիզբ են առնում Որոտանը, Արփան, Սեւանա լիճ թափվող բազմաթիվ աղբյուրներ, ու ամեն բան հիմա թշնամու վերահսկողության տակ է»,- «Հայելի» ակումբում նշեց Աբովյանի անվան թիվ 1 դպրոցի պատմության ուսուցիչ Հայկ Փայտյանը:
«2020թ նոյեմբերի 9-ից հետո հաջորդ գարնանն ու ամռանը արդեն իսկ ջրերի խնդիր կար, ջրամբարների հետ կապված թերակատարում: «Ազգային օրակարգ» կուսակցությունը բազմիցս հայտարարել է, որ թյուրքական կողմն ունի մեկ նպատակ` դա հայության որպես գործոնի ոչնչացումն է, հայկականության գործոնը չպետք է լինի, դրա համար թյուրքական կողմն օգտագործում է տարբեր գործիքակազմեր»,-ասաց Հայկ Փայտյանը` խոսելով հիբրիդային պատերազմի մասին, որը նրա խոսքով` ենթադրում է ջրազրկում, քարոզչություն, խաղաղության պայմանագրի անվան տակ ժողովրդագրական լրջագույն փոփոխություններ Հայաստանում:
Պատմության ուսուցիչն ընդգծում է. «Բացառված տարբերակ է` չի կարող լինել խաղաղություն հայերի եւ թյուրքական տարրերի միջեւ»: Նա փաստում է, որ տարիներով միտումնավոր հետեւյալն են քարոզել. «Իբր մենք հայերս թույլ ենք, պիտի չունենանք ազգային իղձեր եւ երազանքներ, պետք է սպասարկենք օտարներին, իսկ օտարները կարող են լինել, օրինակ, թուրքերը եւ ցանկացածը, ասել են, որ իբր ազգայնական գաղափարախոսությունը կեղծ կատեգորիա է…Այս ամեն ինչի փաթեթավորմամբ տեղի է ունեցել քարոզչական պատերազմ հայության դեմ, ու ցավոք որոշ առումով քարոզողները հաջողել են…
Այսօր հայտարարում են, որ որեւէ բան մեզ չի կարող շեղել խաղաղության օրակարգից, մինչդեռ նա, ում հետ պատրաստվում են խաղաղության, հայտարարում է, որ եւ Սյունիքն է իրենցը, եւ եւ Երեւանը եւ ամբողջ Հայաստանը: Սա պետք է հասցնել հայությանը քարոզչական եւ այլ միջոցներով…»:
Կարդացեք նաև
Գոհար ՀԱԿՈԲՅԱՆ
