«Այս կարգավորումներով օրենքի բարեխիղճ կիրառման դեպքում ես խնդիր չեմ տեսնում։ Որեւէ կարգավորում կիրառելու վատ մտադրություն ունենալու դեպքում հնարավոր է այն ի չարս գործադրել, տարբերակված գործադրել»,-խորհրդարանում լրագրողների հետ ճեպազրույցում այսօր անդրադառնալով ՔՊ խմբակցության հեղինակած՝ պետական մարմնում աշխատակարգի խախտում թույլ տված լրագրողին փոխարինել ենթադրող օրենսդրական նախաձեռնությանը՝ ասաց ՀՀ ՄԻՊ Քրիստինե Գրիգորյանը։
«Հետեւելու ենք, մշտադիտարկում ենք իրականացնելու օրենքի կիրառության վերաբերյալ։ Տեղեկություններ ենք պահանջելու նաեւ ԱԺ-ից, որովհետեւ ինչպես հասկացա՝ հիմնական խնդիրն այս պետական հաստատության դեպքում է։ Տեղեկություն ենք պահանջելու լրագրողի կողմից խախտման արձանագրման, դրա գնահատման վերաբերյալ։ ԶԼՄ-ների աջակցությունը եւս ակնկալում եմ, որ դիմեն։ Մենք էլ կհասկանանք՝ եթե այն վատ կիրառվի, ես ձեր կողքին եմ։ Բայց եթե բարեխիղճ կիրառվի, ապա ես ռիսկ չեմ տեսնում»,-նշեց նա։
Քրիստինե Գրիգորյանը համաձայնեց նկատառման հետ, որ ԶԼՄ դաշտն ինքնակարգավորվող է․ «Ինքնակարգավորումը մասնագիտության անկախության երաշխավորման ձեւ է։ Երբ, օրինակ, խոսում ենք փաստաբանների մասին, նրանք ինքնակարգավորվող աշխատանք ունեն։ Պրոֆեսիոնալ լրագրողները պետք է սահմանեն նշաձող եւ հավասարապես թույլ չտան դրա իջեցումը, այդ դեպքում պետությունն անելիք չի ունենա»։
Կարդացեք նաև
Լուիզա ՍՈՒՔԻԱՍՅԱՆ
