Հայաստանում Բուլղարիայի դեսպանությունն իր հարկի ներքո ընդունել էր Երեւանի Պեյո Յավորովի անվան թիվ 131 դպրոցի սաներին՝ երեխաների պաշտպանության օրվա եւ բուլղարական գրի տոների առիթով: Դպրոցի հետ դեսպանությունը բարեկամություն է անում դպրոցի անվանակոչության օրվանից սկսած:
Լրագրողների հետ զրույցում Հայաստանում Բուլղարիայի դեսպան Կալին Անաստասովը նշեց, որ մայիսի 24-ը եւ հունիսի 1-ը նշանակալի տոներ էր Բուլղարիայի համար, դրանք կրթության, լուսավորության, մշակույթի եւ ապագայի տոներն են: «Հայաստանում Բուլղարիայի դեսպանությունը շատ ցանկացավ, որ հունիսի 1-ը եւ բուլղարական գրերի տոնը, որ սովորաբար նշվում է մայիսի 24-ին, նշել մեր ամենահարազատ ընկերների ու բարեկամների հետ: Դա նախ եւ առաջ մեր բանաստեղծ Պեյո Յավորովի անվան թիվ 131 դպրոցն է»,-ասաց նա:
Դեսպանի խոսքով. «Երեխաները ներկայի եւ ապագայի միջեւ կամուրջ են: Այսօր մենք հյուրընկալել ենք երեխաների, որոնց մեջ ամենայն հավանականությամբ կարող են լինել բացառիկ օժտվածություն ունեցողներ, որոնք վաղը կարող են փառաբանել իրենց երկրի անունը: Իհարկե, չպետք է մոռանալ նաեւ ուսուցիչների ներդրումի մասին, նրանք կրթության ու գիտության պահապաններ են, որոնց հավերժորեն շնորհակալ ենք եւ խոնարհվում ենք նրանց առաջ»:
Կալին Անաստասովն ասաց, որ բոլոր երեխաններին կտրվեն սիմվոլիկ նվերներ, նրանք կմասնակցեն խաղերի ու վիկտորինայի: Դեսպանության բակում նաեւ բացվել էր դպրոցակաների նկարչական աշխատանքների ցուցահանդեսը:
Պեյո Յավորովի անվան թիվ 131 դպրոցի տարրական դասարանի ուսուցչուհի Սուսաննա Աբազյանը նշեց, որ անչափ տպավորված է ընդունելությամբ, նաեւ պատմեց այն զրույցի մասին, որ ունեցել է դասարանում՝ հունիսի 1-ի խորհրդի մասին:
«Մեր դպրոցը բուլղարացի մեծ բանաստեղծի անունով է, որը հայերի սրտակից բարեկամն է եղել: Դպրոցի անվանակոչության օրվանից սկսած մի տեսակ կամուրջ ենք դարձել Բուլղարիա-Հայաստան բարեկամության, հիմնականում մենք ենք հյուրընկալել բուլղարական պատվիրականություններին, բայց այսօր մի փոքր ձեւաչափը շրջել ենք: Երախտապարտ ենք դեսպանին, որ դեպի երեխաներն է շրջվել, ոչ տրորված ճանապարհով ենք գնում, եւ մեր երեխաները իրենց իրավունքների պաշտպանության օրը, որը զուգահեռվում է սլավոնական գրի տոնի հետ, այստեղ անցկացնել ու օրը գեղեցիկ վայելելու հնարավորություն են ստացել»,-ասաց դպրոցի տնօրեն Նաիրա Զաքարյանը:
Գոհար ՀԱԿՈԲՅԱՆ
