Ֆրանսիայի հրապարակից սկիզբ առաջ «Դիմադրության» շարժման երթը, որին մասնակցում են կանայք եւ երեխաներ, անցավ Հանրապետության հրապարակով: Այստեղ, ցուցարարներին դիմավորեցին ոստիկանական մեքենաներ, որոնք զարդարված էին փուչիկներով:
Կարմիր բերետավորները սկսեցին ծաղիկներ նվիրել երթում գտնվող երեխաներին:
Կառավարության շենքի դիմաց երեխաները կավիճով գրեցին՝ «Նիկոլ դավաճան», նկարեցին Արցախի դրոշը, նաեւ՝ Հայաստանի դրոշների գույներով փուչիկներ բաց թողեցին երկինք՝ հանուն Հայաստանի եւ Արցախի:
Կառավարության շենքը պաշտպանված էր մեծ թվով ոստիկաններով:
Կարդացեք նաև
Հիշեցնենք, «Դիմադրության» շարժումն այսօր՝ Երեխաների իրավունքների պաշտպանության միջազգային օրվա առթիվ, Ֆրանսիայի հրապարակից երթ է սկսել, որին մասնակցում են կանայք եւ երեխաները: Մինչ երթի մեկնարկը Հրանտ Թոխատյանը հրապարակում հավաքված երեխաների համար հեքիաթ էր կարդում:
Կառավարության շենքի մոտ, լրագրողների հետ զրույցում, «Հայաստան» խմբակցության պատգամավոր Արեգնազ Մանուկյանը նկատեց, որ այսօր օրացույցով Երեխաների իրավունքների պաշտպանության օրն է, բայց այսօր ծնվել է նաեւ «փոքրիկ, վախկոտ, չմարդ»:
Նա նկատի ունի վարչապետ Նիկոլ Փաշինյանին, ում ծննդյան օրն է այսօր եւ ում պատճառով հազարավոր երեխաներ չծնվեցին, քանի որ 44-օրյա պատերազմում մենք հազարավոր զոհեր ունեցանք. «Հազարավոր երեխաներ որբացան, հազարավոր տղաներ այդպես էլ ծնող չդարձան, որովհետեւ նրանց դարձրին դավադիր պատերազմի զոհեր»:
Արեգնազ Մանուկյանը նկատեց՝ ցավալի զուգադիպությամբ այսօր նաեւ Սոնայի ծննդյան տարեդարձն է, ով իր դեռ չծնված երեխայի հետ զոհ գնաց այդ «փոքրիկ, վախկոտ, չմարդի» ավտոշարասյանը:
«Այդ փոքրիկ, վախկոտ, չմարդը կործանեց Հայաստանի եւ Արցախի երեխաների անցյալը, պղծում է ապագան, ուզում է ավերել նաեւ ներկան: Մենք այդ մարդու ձեռքը պետք է բռնենք»,- ասաց ընդդիմադիր պատգամավորը՝ հավելելով, որ քանի այդ մարդը նստած է վարչապետի աթոռին, Հայաստանին եւ Արցախին միայն աղետ է սպասվում: Ընդդիմադիր պատգամավորի համոզմամբ, մենք պարտավոր ենք մեր երեխաներին փոխանցել՝ «առանց Նիկոլ Հայաստան»:
Նելլի ԳՐԻԳՈՐՅԱՆ
