Հայաստանի և Ադրբեջանի միջև վերջին օրերի լարվածության համատեքստում Եվրամիության խորհրդի նախագահ Շառլ Միշելը հայտարարություն է տարածել, որում վերահաստատել է ԵՄ հանձնառությունը խորացնելու համագործակցությունը Հայաստանի և Ադրբեջանի հետ՝ խթանելու այնպիսի Հարավային Կովկաս, որը կլինի անվտանգ, կայուն, խաղաղ և բարգավաճ՝ ի շահ տարածաշրջանում ապրող բոլոր մարդկանց:
Միշելը ողջունել է մայիսի 24-ին երկու երկրների սահմանային հանձնաժողովների առաջին պատմական հանդիպումը և ընդգծել Հայաստանի և Ադրբեջանի միջև պետական սահմանի երկայնքով կայունության և անվտանգության ապահովման առաջնահերթ կարևորությունը, որին հետամուտ է լինելու սահմանազատումը:
Ավելի լայն իմաստով՝ նախագահ Միշելն ընդգծել է, որ Հայաստանի և Ադրբեջանի միջև հարաբերությունների կայուն կարգավորման համար կարևոր է լուծել բոլոր առկա խնդիրները, ներառյալ ապագա խաղաղության պայմանագրի շուրջ քննարկումների առաջմղումը, և լուծել հակամարտության խորքային պատճառները:
Նախագահ Միշելի կարծիքով, բոլոր հիմնական խնդիրները, որոնք հանգեցրել են Լեռնային Ղարաբաղի առաջին պատերազմին, ինչպես նաև 2020թ. ռազմական գործողությունների վերսկսմանը, պետք է լուծվեն բոլոր շահագրգիռ կողմերի կողմից՝ պայմաններ ստեղծելու համար կայուն և արդար խաղաղության համար:
Կարդացեք նաև
«Ինչպես ցանկացած հակամարտության դեպքում, տերմինաբանությունը հատկապես զգայուն է այս համատեքստում: Նախագահ Միշելի հայտարարությունը մայիսի 22-ին կայացած առաջնորդների հանդիպման արդյունքների վերաբերյալ չպետք է մեկնաբանվի որպես ի նպաստ քննարկումների նախապես որոշված արդյունքի: Ամենակարևորը, ի վերջո, այն է, որ բոլոր խնդիրները համակողմանիորեն լուծվեն. սա ներառում է բոլոր բնակչության իրավունքներն ու անվտանգությունը»,- ասվում է հայտարարության մեջ:
Կապի հնարավորությունները առանձնահատուկ կերպով քննարկվել են մայիսի 22-ին Բրյուսելում՝ տարածաշրջանի ապաշրջափակման հնարավորությունները զարգացնելու նպատակով: Այս համատեքստում երկու կողմերը հաստատել են, որ ապագա տրանսպորտային ենթակառուցվածքների հետ կապված արտատարածքային պահանջներ չկան: Հակառակ շահարկումները ցավալի են:
Ի վերջո, նախագահ Միշելը շեշտել է բնակչությանը խաղաղության նախապատրաստելու անհրաժեշտությունը և այս հարցում հանրային հռետորաբանության կարևոր դերը:
Նա ողջունել է Երևանի և Բաքվի ղեկավարությանը և ընդգծել, որ նրանք մտադրված են բարեխղճորեն ներգրավվելու բանակցությունների շարունակման համար բարենպաստ մթնոլորտի ապահովման գործում,՛ ինչպես նաև ԵՄ-ի կողմից պատրաստակամություն է հայտնել ուժեղացնել աջակցությունը վստահության ամրապնդման միջոցառումներին:
Հայտարարության մեջ նշվում է, որ ԵՄ հատուկ ներկայացուցիչ Տոյվո Քլաարը մոտ օրերս կմեկնի տարածաշրջան՝ հետևելու քննարկվող բոլոր ասպեկտներին:
Պատրաստեց Վիկտորյա ԱՆԴՐԵԱՍՅԱՆԸ
